求上帝幫贊的晚禱大闢的詩，交互聖樂長；用弦的樂器伴奏。 1 為我辯護的上帝啊， 我求叫的時，求你應我。 我困苦的時，你有給我解放； 今求你憐憫我，聽我的祈禱。
2 恁諸個人啊，恁將我的尊榮變做見笑欲偌久？ 恁意愛空虛，追尋虛假，欲到底時？
3 著知上主已經分別敬虔的人做伊家己的； 我求叫上主，伊會聽我的聲。
4 著驚惶，毋通犯罪； 佇眠床歇睏的時，心著安靜自省。
5 著獻合上帝心意的祭； 嘛著倚靠上主。
6 真多人啲問：「啥人會當互阮得著福氣？」 上主啊，求你用你面的光照阮。
7 你互我心內有歡喜， 贏過人得著真多五穀及新酒。
8 我欲安然倒啲睏， 因為只有上主你會互我安穩徛起。
