Si-phian 39 - 現代台語譯本漢字版

受苦的人的祈禱

大闢的詩，交互聖樂長耶杜頓。

¹ 我曾講：「我欲謹慎我的言行， 才免我的舌犯罪； 歹人佇我面前的時， 我欲用嘴罨約束家己的嘴舌。」

² 我恬恬無出聲， 連好話都無講出嘴； 我的痛苦就愈加添。

³ 我內心一直燒起來， 我愈想火愈𤏸， 我就開嘴講：

⁴ 「上主啊，求你互我知家己的結局， 家己的年歲有偌多， 互我知家己的性命真緊就無去。

⁵ 「你互我的日子實在真短； 我的歲壽對你看起來差不多是無； 人不過是一個氣。

⁶ 人啲活親像影； 𪜶無閒吱吱實在無採工； 𪜶所積聚的毋知啥人會得去。

⁷ 「主啊，今我著聽候什麼？ 我的向望在佇你。

⁸ 求你救我脫離我一切的過失， 互我免受戇人的凌辱。

⁹ 因為是你互我受苦， 我靜靜無開嘴。

¹⁰ 你互我的責罰，求你給我除去； 因為你的手的督責，我啲欲消滅。

¹¹ 你責罰人，因為𪜶犯罪； 你互𪜶所意愛的親像著蛀蟲灰去。 人不過是一個氣。

¹² 「上主啊，求你聽我的祈禱， 俯耳孔聽我的懇求； 我流目屎，求你毋通無出聲。 我是依倚你的出外人， 及我的列祖像款是寄居的。

¹³ 求你寬容我， 互我猶未死以前得著歡喜快樂。」