Si-phian 38 - 現代台語譯本漢字版

受苦的人的祈禱

大闢紀念的詩。

¹ 上主啊，求你毋通受氣責備我， 毋通發大受氣責罰我。

² 你的箭射入我的身軀； 你的手重重扼我。

³ 你的受氣互我的身軀無一位健全； 我的罪過互我的骨頭無一支好好。

⁴ 我的罪過疊起來，超過我的頭殼， 親像重擔互我擔𣍐起。

⁵ 我因為愚戇， 致到孔嘴爛閣臭。

⁶ 我互罪硩甲欲躄落去， 歸日行來行去哼哼呻。

⁷ 我的腰親像火啲𤏸； 我的身軀無甲一位健全。

⁸ 我受硩傷，歸身軀麻痺； 我的心苦痛，大聲哀呻。

⁹ 主啊，我的心願你攏知； 我的吐氣嘛無對你掩蓋。

¹⁰ 我的心噗噗筅，氣力衰微， 連我的目睭都攏無神。

¹¹ 我的朋友同伴因為我的歹症頭攏閃開； 我的親人嘛徛遠遠。

¹² 數想我性命的人設羅網； 欲害我的人講惡毒的話， 歸日啲設計詭詰的陰謀。

¹³ 我親像臭耳人𣍐聽見， 親像啞口𣍐講話。

¹⁴ 我親像無聽見的人， 有嘴嘛𣍐當答辯。

¹⁵ 上主啊，我仰望你； 主 — 我的上帝啊，你欲應答我。

¹⁶ 我曾講：「求你毋通互𪜶對我誇口； 我的腳踏脫的時，毋通互𪜶對我誇耀。」

¹⁷ 因為我險險仔跋倒； 我的苦痛不時纏隨我。

¹⁸ 我欲認我的罪惡， 為著我的罪憂悶。

¹⁹ 我的對敵強閣勇； 無緣無故怨恨我的人加添真多。

²⁰ 用歹報好的人及我做對頭； 因為我追求良善。

²¹ 上主啊，毋通放拺我； 我的上帝啊，毋通離開我遠遠。

²² 主 — 我的救主啊， 緊來救我！