Si-phian 37 - 現代台語譯本漢字版

義人及罪人的結局

大闢的詩。

¹ 毋通因為做歹的人心內不平； 毋通怨妒行為不義的人；

² 因為𪜶親像草真緊就焦去， 親像青翠的花草凋去。

³ 著倚靠上主來做好， 𫢶佇此個土地安居樂業。

⁴ 著因為上主來歡喜； 伊會滿足你的心願。

⁵ 著將你的路途交託上主， 倚靠伊，伊會給你成全。

⁶ 伊會互你的義親像光發出； 你的正直親像中晝的日頭。

⁷ 著靜靜佇上主面前吞忍聽候； 毋通因為歹人的計謀成功來不平。

⁸ 毋通受氣，著棄拺大受氣； 毋通不平，才免致到做歹。

⁹ 因為做歹的人會受剿滅； 聽候上主的人會承受所應允的土地。

¹⁰ 歹人真緊就會無去； 你詳細查伊的所在，嘛尋𣍐著。

¹¹ 毋拘謙卑的人會承受所應允的土地， 享受繁榮和平。

¹² 歹人設計欲害義人， 痛恨伊，對伊咬牙切齒。

¹³ 主會給伊恥笑， 因為知伊受報應的日子啲欲到。

¹⁴ 歹人拔刀開弓， 欲打倒困苦散赤的人， 刣死行為正直的人。

¹⁵ 𪜶的刀會鑿入去家己的心； 𪜶的弓會受遏斷。

¹⁶ 義人所有的雖然真少， 嘛比歹人有真多財富較好。

¹⁷ 歹人的手骨會受遏斷， 毋拘上主扶持義人。

¹⁸ 上主眷顧完全的人的年日； 𪜶的產業會當永遠保存。

¹⁹ 𪜶佇患難的時𣍐致到見笑， 佇飢荒的日會得著飽足。

²⁰ 總是歹人會滅亡。 上主的對敵會假若野花謝去， 親像火燻消散。

²¹ 歹人給人借，毋還； 義人慷慨施捨。

²² 上主賜福的人會承受所應允的土地； 受伊咒詛的人會滅亡。

²³ 上主互義人的腳步穩固； 伊歡喜𪜶的所行所做。

²⁴ 𪜶著觸嘛𣍐跋倒， 因為上主用手扶𪜶。

²⁵ 我前少年今年老， 毋曾看著義人受放拺， 伊的後代做乞食。

²⁶ 伊不時慷慨施捨，歡喜借人； 伊的子孫得著祝福。

²⁷ 著拒絕歹，做好事， 就會永遠安然徛起。

²⁸ 上主意愛公平， 𣍐放拺伊聖的子民。 𪜶永遠受保護； 毋拘歹人的子孫會受剿滅。

²⁹ 義人會承受所應允的土地， 永遠𫢶佇遐。

³⁰ 義人的嘴講智慧； 伊的舌談論公平。

³¹ 上帝的律法佇伊心內； 伊的腳攏𣍐踏脫。

³² 歹人金金啲相義人， 數想欲刣伊。

³³ 上主𣍐放伊落佇歹人的手， 審判的時伊𣍐受定罪。

³⁴ 著聽候上主，遵守伊的道路， 伊就高升你，互你承受所應允的土地； 你會看著歹人消滅。

³⁵ 我看見強暴的歹人興旺， 親像樹佇家己的土地茂盛。

³⁶ 有人對遐經過，看咧，伊無去啦； 我尋嘛尋攏無。

³⁷ 詳細看完全正直的人， 因為愛和平的人有好的將來。

³⁸ 毋拘犯法的人會做一下滅亡； 歹人最後會受剿滅。

³⁹ 總是義人對上主得著拯救； 患難的時，伊做𪜶的避難所。

⁴⁰ 上主幫贊𪜶，拯救𪜶； 伊救𪜶，解放𪜶脫離歹人， 因為𪜶倚靠伊得著保護。