Si-phian 36 - 現代台語譯本漢字版

人的罪惡及上帝的公義

上主的僕人大闢的詩，交互聖樂長。

¹ 罪佇歹人的心底策動； 伊眼中毋驚上帝。

² 對伊來看，罪是伊的誇口， 家己想講上帝𣍐發見，𣍐厭惡。

³ 伊講的話攏是罪惡及奸詐； 伊無閣再有智慧，嘛無好的行為。

⁴ 伊佇眠床頂猶啲計謀罪惡。 伊決定欲行歹路， 毋棄拺歹代。

⁵ 上主啊，你的慈愛高到抵天； 你的信實到穹蒼。

⁶ 你的公義親像極高的山； 你的判斷親像深淵。 上主啊，人及牲生你攏眷顧。

⁷ 上帝啊，你的慈愛哪赫寶貝！ 世間人攏來匿佇你翼股的保護下。

⁸ 𪜶欲佇你的厝享受豐富的宴席； 你欲互𪜶飲你快樂的河水。

⁹ 因為活命的源頭在佇你； 對你的光，阮看見光。

¹⁰ 願你繼續施落慈愛互識你的人， 施落公義互心內正直的人。

¹¹ 毋通容允驕傲的人的腳踐踏我； 毋通容允兇惡的人的手趕逐我。

¹² 你看，做歹的人已經倒落去； 𪜶受捙倒，𣍐當閣起來。