Si-phian 34 - 現代台語譯本漢字版

感謝上主的保護

大闢的詩。伊佇亞比米勒面前假瘋癲，受趕出去的時做的詩。

¹ 我欲不時稱讚上主； 我的嘴欲常常謳咾伊。

² 我的心神欲誇口上主； 困苦的人聽見嘛會歡喜。

³ 著及我稱讚上主做大， 做夥尊崇伊的名。

⁴ 我求叫上主，伊有應我， 救我脫離一切的驚惶。

⁵ 仰望伊的人面有光彩，心快樂； 𪜶永遠𣍐致到見笑失望。

⁶ 散赤人求叫，上主有聽見， 救伊脫離一切的艱難。

⁷ 上主的使者佇敬畏伊的人的四圍紮營， 救𪜶脫出困境。

⁸ 親身體驗，就知上主真好； 尋伊做避難所的人真有福氣。

⁹ 上主聖的子民啊，著敬畏伊， 因為敬畏伊的人攏無欠缺。

¹⁰ 少壯的獅嘛會欠缺，會枵， 毋拘尋求上主的人什麼好物都無欠。

¹¹ 細子啊，著來聽， 我欲教示恁敬畏上主。

¹² 恁中間啥人意愛性命， 愛長歲壽通享福？

¹³ 著禁家己的舌無講歹話， 禁止嘴唇無講詭詐。

¹⁴ 著拒絕歹，做好事， 熱心追求和平。

¹⁵ 上主的目睭看顧義人； 伊的耳孔聽𪜶的祈禱。

¹⁶ 上主對作歹的人變面， 對世間擦消𪜶的名。

¹⁷ 上主聽義人的求叫， 救𪜶脫離一切的艱難。

¹⁸ 上主親近心靈破碎的人， 拯救心痛悔的人。

¹⁹ 義人有真多苦難， 毋拘上主救𪜶攏脫離。

²⁰ 上主保全𪜶攏總的骨頭， 一支都無拍折。

²¹ 罪惡會害死歹人； 怨恨義人的，會受定罪。

²² 上主救贖伊的僕人； 倚靠伊的人連一個都𣍐受定罪。