Si-phian 32 - 現代台語譯本漢字版

認罪及感謝

大闢教示的詩。

¹ 過失得著赦免，罪過得著擦消， 此款人真有福氣！

² 心無奸詐，上主無算伊有罪， 此款人真有福氣！

³ 我若恬恬毋認罪， 就歸日哼哼呻，連骨頭都焦去。

⁴ 你的手暝日重重刑罰我， 我的精力親像互熱天的日頭曝甲焦焦去。

⁵ 我有對你排列我的罪， 無隱瞞我的罪惡。 我欲對上主承認我的過失； 你就赦免我所犯的罪。

⁶ 按呢，虔誠的人攏著佇通尋著你的時對你祈禱； 大水氾濫嘛一定𣍐淹著伊。

⁷ 你是我閃匿的所在， 會庇祐我脫離艱苦； 你會用得救的歌四面圍我。

⁸ 上主講：「我欲教示你，指示你應該行的路； 我欲注目看你，眷顧你。

⁹ 毋通親像馬、騾，無智識； 𪜶著用馬咬韁、馬勒索約束才會馴服。」

¹⁰ 歹人會受真多痛苦； 毋拘倚靠上主的人有慈愛四面圍伊。

¹¹ 義人啊，著因為上主來歡喜快樂！ 心正直的人啊，著大聲歡呼！