Si-phian 31 - 現代台語譯本漢字版

信靠的祈禱

大闢的詩，交互聖樂長。

¹ 上主啊，我靠你做我的保護。 求你互我永遠𣍐失敗見笑； 你是公義的上帝，求你解救我。

² 求你俯耳孔聽我，趕緊來救我， 做我堅固的石磐，做堡壘拯救我。

³ 你是我的山巖，我的堡壘， 求你照你的名領導我，引導我。

⁴ 人暗中設羅網欲網我，求你救我脫離， 因為你是我的堡壘。

⁵ 我將我的靈魂交代你； 上主 — 信實的上帝啊，你會救贖我。

⁶ 我厭惡擒牢無路用的偶像的人； 我只有信靠上主。

⁷ 我欲因為你的慈愛歡喜快樂； 因為你有看見我的艱苦，知我內心的苦痛。

⁸ 你無給我交佇對敵的手； 你互我的腳徛佇開闊安穩的所在。

⁹ 上主啊，我佇患難中，求你憐憫我。 我的目睭因為憂傷花去； 我的心神，我的身軀衰弱。

¹⁰ 我的性命因為憂苦消盡； 我的年歲因為哀傷減少。 我的氣力因為我的罪過衰荏； 我的骨頭枯焦。

¹¹ 我所有的對敵攏凌辱我； 我的厝邊給我侮辱； 連識我的人嘛攏驚我； 佇路裡看著我的人攏閃開。

¹² 我親像死人互人𣍐記得，無人數念； 我親像破去的器具互人挕拺。

¹³ 我聽見真多人四界啲造謠； 周圍充滿恐怖。 𪜶參詳欲攻擊我， 計謀欲害我的性命。

¹⁴ 上主啊，我猶久欲倚靠你； 我講：「你是我的上帝。」

¹⁵ 我的一生佇你的手中； 求你救我脫離對敵的手及窘迫我的人。

¹⁶ 求你用你的面的光照你的僕人， 照你的慈愛拯救我。

¹⁷ 上主啊，求你互我無致到見笑， 因為我求叫你。 求你互歹人失敗見笑， 互𪜶佇陰府恬恬無話通講。

¹⁸ 願你互白賊的嘴變啞口， 𣍐閣驕傲給人看輕，濫糝侮辱義人。

¹⁹ 佇世間人面前，你為著敬畏你的人積聚的恩惠偌仔呢大！ 你為著尋你做避難所的人所賜的恩惠偌仔呢好！

²⁰ 你給𪜶藏佇你的面前隱密的所在， 𪜶才免陷落人的陰謀。 你暗靜保守𪜶佇帳幕內， 𪜶才免受嘴舌的中傷。

²¹ 上主應該受稱讚， 因為城受圍困的時，伊有對我顯出奇妙的疼。

²² 我曾著急講「你給我趕走毋插我」， 毋拘我求叫的時，你有聽我懇求的聲。

²³ 上主聖的子民啊，恁攏著疼伊。 上主保守忠信的人， 嚴嚴報應驕傲的人。

²⁴ 所有仰望上主的人啊， 恁著壯膽，心堅固。