Si-phian 30 - 現代台語譯本漢字版

感恩的詩

大闢的詩，獻聖殿抑是宮殿的歌。

¹ 上主啊，我欲尊你做至高， 因為你有提拔我，無互我的對敵對我誇口。

² 上主 — 我的上帝啊， 我求叫你，你有醫好我。

³ 上主啊，你對陰府給我扭出來； 你互我活啲，免入墓壙孔。

⁴ 上主聖的子民啊，恁著唱歌謳咾伊， 稱讚伊的聖名。

⁵ 伊的受氣只有一時仔久； 伊的恩典到一世人。 雖然歸暝有啼哭， 天一下光就有歡喜。

⁶ 佇我順利的時，我曾講： 「我永遠𣍐動搖。」

⁷ 上主啊，你施恩，互我親像山徛在在； 你面越走毋看我，我就驚惶。

⁸ 上主啊，我求叫你； 我對上主求憐憫，講：

⁹ 「我死，入墓，有啥利益？ 土粉豈會稱讚你，豈會報揚你的信實？」

¹⁰ 上主啊，求你聽我，憐憫我； 上主啊，求你幫贊我。

¹¹ 你有將我的啼哭變做跳舞， 將我的麻衫褪起來，用歡喜做帶給我縖。

¹² 按呢我的心神就𣍐恬恬，會唱歌稱讚你； 上主 — 我的上帝啊，我欲永遠感謝你。