Si-phian 27 - 現代台語譯本漢字版

信靠上主

大闢的詩。

¹ 上主是我的光，我的拯救， 我猶著驚啥人？ 上主是我性命的保障， 我猶著驚啥人？

² 雖然歹人攻擊我，對敵吞食我， 𪜶攏會跋倒失敗。

³ 雖然大軍紮營包圍， 我的心亦𣍐驚惶。 雖然對敵發動戰爭， 我猶原安穩自在。

⁴ 我對上主求一項代誌， 只有對伊求此項： 互我一世人𫢶佇上主的厝， 佇聖殿仰望伊的榮光，尋求伊的指示。

⁵ 我抵著患難的時，伊會給我藏佇布棚內； 伊會保護我，互我匿佇伊厝內。 伊會給我囥佇石磐頂，

⁶ 互我的頭攑高，超過包圍我的對敵。 我欲佇伊的布棚歡呼獻祭； 我欲唱歌謳咾上主。

⁷ 上主啊，我求叫的聲求你聽， 求你憐憫我，應答我！

⁸ 我的心對我講： 「著來朝見伊。」 上主啊，我來朝見你。

⁹ 求你毋通面越走毋插我， 毋通受氣趕你的僕人。 你一直是我的幫贊。 拯救我的上帝啊， 求你毋通拒絕我，放拺我。

¹⁰ 設使我的父母棄拺我， 上主嘛一定會收留我。

¹¹ 上主啊，求你指示我應該行的路， 因為對敵啲當等，求你導我行平坦的路。

¹² 毋通照對敵的心願給我交互𪜶， 因為𪜶用偽證恐嚇我。

¹³ 我深信一項事： 我猶活啲的日會享受上主的恩惠。

¹⁴ 著信靠上主！ 著勇敢壯膽！ 著信靠上主！