Si-phian 26 - 現代台語譯本漢字版

正直的人的祈禱

大闢的詩。

¹ 上主啊，求你判我無罪， 因為我有照正直啲行。 我倚靠上主無動搖。

² 上主啊，求你監察我，考驗我； 求你察驗我的心思意念。

³ 因為你的慈愛佇我的目睭前； 我有照你的真理啲行。

⁴ 我毋曾及虛假的人做夥坐， 嘛毋曾及假好的人鬥陣。

⁵ 我厭惡及歹人結黨， 無愛及惡毒的人做夥坐。

⁶ 上主啊，我洗手表示無罪， 踅你的祭壇參加禮拜；

⁷ 我用感謝的詩歌頌讚， 講起你一切奇妙的作為。

⁸ 上主啊，我意愛你住的厝， 意愛你的榮光臨在的所在。

⁹ 毋通將我的性命及罪人做夥消滅； 毋通將我的活命及刣人的做一下消滅。

¹⁰ 𪜶的手不時做歹； 𪜶的正手逐所在收賄賂。

¹¹ 若是我，我欲照正直來行； 求你救贖我，憐憫我。

¹² 我的腳徛佇平坦的所在； 我欲佇大會中稱讚上主。