Si-phian 25 - 現代台語譯本漢字版

求上主引導保護

大闢的詩。

¹ 上主啊，我的心神仰望你！

² 我的上帝啊，我信靠你！ 毋通互我失敗致到見笑； 毋通互我的對敵因為贏我來誇口。

³ 所有聽候你幫贊的人一定𣍐致到見笑； 會抵著見笑的是許個無緣無故背叛你的人。

⁴ 上主啊，求你將你的路指示我， 將你的道教示我。

⁵ 求你用你的真理引導我，教示我， 因為你是拯救我的上帝。 我歸日聽候你。

⁶ 上主啊，求你會記得你的憐憫及慈愛， 因為你對古早就按呢對待人。

⁷ 求你毋通記牢我少年的時的罪過及過失； 上主啊，求你照你的慈愛，因為你的恩惠會記得我。

⁸ 因為上主良善閣正直， 伊欲指示罪人行正路。

⁹ 伊欲用公平引導謙卑的人， 用伊的道路教示謙遜的人。

¹⁰ 守伊的約及伊的誡命的人， 上主攏用慈愛及信實款待𪜶。

¹¹ 上主啊，我的罪真重， 求你赦免我。

¹² 敬畏上主的人， 上主欲指示伊所著揀的路。

¹³ 伊的心神會得著安歇； 伊的後代會承接所應允的土地。

¹⁴ 上主及敬畏伊的人親密， 欲將伊的約指示𪜶。

¹⁵ 我的目睭不時仰望上主， 伊欲互我的腳脫離羅網。

¹⁶ 求你越過來看我，憐憫我， 因為我孤單困苦。

¹⁷ 我心內有真多憂苦， 求你救我脫離攏總的患難。

¹⁸ 求你關心我的艱難困苦， 除去我一切的罪。

¹⁹ 你看，我的對敵赫呢多； 𪜶真惡毒怨恨我。

²⁰ 求你保護我的性命，拯救我， 互我無失敗致到見笑，因為我倚靠你。

²¹ 願純全正直保護我， 因為我仰望你。

²² 上帝啊，求你救贖以色列 脫離一切的災難。