Si-phian 24 - 現代台語譯本漢字版

偉大的君王

大闢的詩。

¹ 地及地上的萬物攏屬上主； 世界及𫢶佇遐的活物嘛攏屬伊。

² 伊給地囥佇大海的頂面， 將地基下佇深海。

³ 什麼款人會當上上主的山？ 什麼款人會當入伊的聖殿？

⁴ 就是手清氣，心純潔， 無拜偶像，無隨便咒誓的人。

⁵ 此款人會受上主祝福； 上帝欲拯救伊，宣判伊無罪。

⁶ 此款人尋求上主， 到雅各的上帝面前來朝見伊。

⁷ 城門啊，著拍開！ 永遠的門啊，著大開！ 榮耀的君王欲入來。

⁸ 此位榮耀的君王是什麼人？ 是強閣勇的上主！ 伊是百戰百勝的上主！

⁹ 城門啊，著拍開！ 永遠的門啊，著大開！ 榮耀的君王欲入來。

¹⁰ 此位榮耀的君王是什麼人？ 是上主 — 萬軍的統帥！ 伊是榮耀的君王！