Si-phian 22 - 現代台語譯本漢字版

困苦中的哀求及稱讚

大闢的詩，交互聖樂長；調，用「早起時的鹿母」。

¹ 我的上帝，我的上帝，你是按怎放拺我？ 你是按怎離我遠遠毋救我，毋聽我的喉叫？

² 我的上帝啊，我日時求叫，你無應我； 我暝時求叫，無得著安寧。

³ 你是聖的上帝， 你用以色列的稱讚做寶座。

⁴ 阮的列祖倚靠你； 𪜶倚靠你，你有解救𪜶。

⁵ 𪜶哀求你，有得著拯救； 𪜶倚靠你，你無互𪜶失望。

⁶ 毋拘我毋是人，是蟲𧒴， 互人譏刺，受眾人看輕。

⁷ 看著我的人攏給我恥笑， 撓嘴幌頭，講：

⁸ 「你將本身交代上主，伊哪無來救你？ 既然上主合意你，伊哪無來救你？」

⁹ 你對母胎給我接出來； 你互我佇老母的胸前得著安穩。

¹⁰ 我對出母胎就交託你， 對我出世，你就是我的上帝。

¹¹ 求你毋通離我遠遠， 因為患難逼近，無人幫贊我。

¹² 有真多牛包圍我； 巴珊的野牛四面圍困我。

¹³ 𪜶親像獅開嘴大聲哮， 欲拆裂吞食我。

¹⁴ 我的氣力親像水摒了了； 我的骨頭攏脫輪； 我的心親像蠟佇腹內消熔。

¹⁵ 我的精力焦去，親像破去的瓦片； 我的舌黏佇頂顎𣍐講話； 你給我放佇土腳，出在我死。

¹⁶ 歹人親像歸群狗包圍我， 親像獅拆裂我的腳、我的手。

¹⁷ 我的骨頭攏會算得； 𪜶啲看我，啲相我。

¹⁸ 𪜶分我的外袍， 為著我的衫抽籤。

¹⁹ 上主啊，求你毋通離我遠遠； 上帝 — 我的氣力啊，求你緊來幫贊我。

²⁰ 求你救我脫離刀劍， 救我的性命脫離狗的勢力。

²¹ 求你救我脫離獅的嘴； 你已經有聽我，互我脫離野牛的角。

²² 我欲對我的兄弟報揚你的名； 我欲佇聚會中謳咾你。

²³ 恁敬畏上主的，著稱讚伊。 以色列的後代，著歸榮光互伊； 雅各的後代，攏著敬畏伊。

²⁴ 因為伊𣍐看輕散赤人，𣍐無視𪜶的困苦， 嘛𣍐面越走毋插𪜶； 𪜶求叫的時，上主有給𪜶聽。

²⁵ 我欲佇大聚會中稱讚你的所做； 我欲佇敬畏上主的人面前謝我的願。

²⁶ 散赤人會得著飽足； 尋求上主的人會稱讚伊。 願恁的心永遠有活氣！

²⁷ 地上所有的人攏會記得上主的所做來歸順伊； 世上萬族攏會佇伊面前敬拜。

²⁸ 因為主權屬佇上主， 伊是萬國的主宰。

²⁹ 地上所有富貴的人會聚集飲食，敬拜； 連啲欲死，啲欲歸土的人都會佇伊面前跪拜。

³⁰ 𪜶的子孫會服事伊； 主的作為會傳到𪜶的後代。

³¹ 人會對將來欲出世的子民講： 「主已經完成伊的拯救。」