Si-phian 21 - 現代台語譯本漢字版

出征的祈禱

大闢的詩，交互聖樂長。

¹ 上主啊，王會因為你互伊的氣力歡喜， 會因為你互伊的勝利非常快樂！

² 伊的心意愛的，你已經有互伊； 伊的嘴所求的，你攏有答應。

³ 因為你用大福氣啲迎接伊， 用純金的王冠戴佇伊的頭殼。

⁴ 伊對你求活命，你有互伊， 互伊的歲壽久久長長。

⁵ 伊因為你互伊的勝利得著大榮光； 你將尊貴威嚴賜互伊。

⁶ 你互伊有大福氣到永遠， 互伊佇你的面前歡喜快樂。

⁷ 因為王倚靠上主， 閣因為至高上帝的慈愛，伊的王位永遠穩固。

⁸ 王的手會掠著一切的對敵； 伊的正手會掠著所有怨恨伊的人。

⁹ 伊一下出現，會親像炎熱的火爐給𪜶燒滅。 上主啊，你一下出現，欲佇大受氣中給𪜶吞落去， 欲用火給𪜶燒滅。

¹⁰ 𪜶的子孫會對地上受剿滅； 𪜶的後代會對人的中間消失。

¹¹ 𪜶欲用陰謀陷害王， 毋拘𪜶的計謀𣍐成功。

¹² 你欲互𪜶越轉身逃走， 欲開弓射𪜶。

¹³ 上主啊，起來，顯示你的氣力； 阮欲吟詩稱讚你的大權能。