Si-phian 2 - 現代台語譯本漢字版

上主選立的王

¹ 列國是按怎啲造聲勢？ 萬民是按怎計劃空空的陰謀？

² 地上的君王啲排陣，統治者鬥陣計謀， 欲對抗上主及伊選立的王。

³ 𪜶講：「咱來摃碎壓制咱的軛， 擦斷捆縛咱的索。」

⁴ 上主坐佇天頂啲笑， 啲恥笑𪜶的陰謀。

⁵ 伊受氣給𪜶警告， 發性地互𪜶驚惶。

⁶ 伊講：「佇我的聖山錫安， 我已經設立所揀選的作王。」

⁷ 王講：「我欲宣告上主的聖旨。 伊給我講：『你是我的子，我今仔日生你。

⁸ 對我求，我就將列國互你做領土， 將全地互你做產業。

⁹ 你欲用鐵柺給𪜶摃， 親像摃碎瓷器。』」

¹⁰ 眾君王啊，著謹慎！ 統治者啊，著接受警戒！

¹¹ 著用敬畏服事上主， 用驚惶屈服佇伊腳下，

¹² 才免伊起性地，互恁佇路中滅亡， 因為伊會隨時發受氣。 尋上主做避難所的人真有福氣！