Si-phian 19 - 現代台語譯本漢字版

上帝的創造及律法

大闢的詩，交互聖樂長。

¹ 天宣布上帝的榮耀； 穹蒼傳揚伊的作為。

² 此日對彼日講話； 此暝對彼暝傳播智識；

³ 無言無語， 無聲無說。

⁴ 𪜶的聲音傳到全世界； 𪜶的言辭傳到天邊海角。 上帝為著日頭佇天頂搭布棚。

⁵ 日頭親像新郎對洞房出來， 親像選手踴躍走伊的路程，

⁶ 對天的此旁出來，踅到彼旁， 熱氣普及萬物。

⁷ 上主的律法完全， 互人得著新的氣力。 上主的命令可靠， 互無智識的人得著智慧。

⁸ 上主的律例公正， 互人的心歡喜。 上主的誡命純潔， 互人的目睭光明。

⁹ 敬畏上主是純真，永遠無改變； 上主的判斷真實，完全公道，

¹⁰ 比金，比真多純金較貴重； 比蜜，比純的蜂蜜閣較甜。

¹¹ 律法互你的僕人得著警戒； 守誡命就有大報賞。

¹² 啥人會知家己的錯誤？ 求你赦免我無意中犯的過失！

¹³ 求你保守你的僕人，互伊𣍐故意犯罪； 求你毋通容允罪惡管轄我， 我就成做無通指責的人， 𣍐犯重罪。

¹⁴ 上主 — 我的避難所，我的救贖主啊， 願我的嘴所講的合你的旨意； 願我的心所想的得著你接納。