Si-phian 18 - 現代台語譯本漢字版

勝利的歌

上主的僕人大闢的詩，交互聖樂長。上主救伊脫離所有的對敵及掃羅的手了後，伊向上主唸此首詩。

¹ 上主 — 我的氣力啊，我敬愛你。

² 上主是我的山巖，我的要塞，我的拯救者； 是我的上帝，我的石磐，我欲倚靠伊； 伊是我的盾牌，救我的氣力，我的堡壘。

³ 我求叫應該受稱讚的上主， 我就得著解救脫離對敵。

⁴ 死亡的索纏我； 毀滅的大水互我驚。

⁵ 陰府的索捆縛我； 死亡的羅網網著我。

⁶ 我佇苦難中祈求上主， 對我的上帝求叫； 伊佇伊的殿內聽我的聲； 我佇伊面前的懇求有入伊的耳孔。

⁷ 伊受氣，地就搖泏； 山的地基嘛振動搖閣泏。

⁸ 對伊的鼻孔有煙淐出； 對伊的嘴有火發出， 連土炭嘛𤏸起來。

⁹ 伊搋開天，親身降臨； 伊腳下有厚厚的烏雲。

¹⁰ 伊騎天使基路伯啲飛； 伊坐風的翼衝落來。

¹¹ 伊用烏暗做伊隱密的所在， 用水及密雲圍起來做帳房。

¹² 冰雹及啲𤏸的炭對伊臨在的光射出來， 突破烏暗的密雲。

¹³ 上主對天頂彈雷， 至高的上帝出聲； 閣有落雹及啲𤏸的炭。

¹⁴ 伊射箭，互對敵四散； 伊發出熠爁，互𪜶混亂。

¹⁵ 上主，你一下責備， 你鼻孔的氣一下出， 海底就露出， 大地的根基嘛露現。

¹⁶ 伊對頂面伸手扭我， 對大水給我救出來。

¹⁷ 伊救我脫離兇猛的對敵， 脫離怨恨我的人； 因為𪜶比我較強。

¹⁸ 我抵著災難的時，𪜶來攻擊我； 毋拘上主是我的倚靠。

¹⁹ 伊導我到開闊安全的所在； 伊救我，因為伊意愛我。

²⁰ 上主因為我正直報答我， 因為我的所做清氣報賞我。

²¹ 我遵守上主的道路， 毋曾作歹離開我的上帝。

²² 伊所有的命令我有遵守； 伊的規例我毋曾放拺。

²³ 我佇伊的面前無通指責； 我保守家己離開罪惡。

²⁴ 因為我正直，上主報賞我； 佇伊的目睭前，我的所做清氣。

²⁵ 慈愛的人，你用慈愛對待伊； 純全的人，你用純全對待伊；

²⁶ 清氣的人，你用清氣對待伊； 毋拘，奸詐的人，你用彎曲對待伊。

²⁷ 困苦的人，你解救伊； 自高的人，你給伊降低。

²⁸ 你點𤏸我的燈； 上主 — 我的上帝給我的烏暗變做光明。

²⁹ 我因為倚靠你，會當攻破敵軍； 倚靠我的上帝，會當跳過城牆。

³⁰ 此位上帝，伊的道路完全。 上主的話有過火鍛鍊； 倚靠伊的，伊做盾牌保護𪜶。

³¹ 上主以外，豈有別個上帝？ 阮的上帝以外，豈有石磐通倚靠？

³² 此位上帝用氣力做帶縖我的腰； 伊引導我行安全的路。

³³ 伊互我的腳親像鹿𠢕走， 閣互我徛在佇高的所在。

³⁴ 伊訓練我的手𠢕交戰， 互我的手會開銅的弓。

³⁵ 你用盾牌解救我， 用正手扶持我。 你眷顧我，互我高升做大。

³⁶ 你互我踏的地開闊安全； 我的腳毋曾踏脫。

³⁷ 我追我的對敵到趇著𪜶； 𪜶無滅亡，我𣍐倒轉。

³⁸ 我拍𪜶悿悿，互𪜶𬦰𣍐起來， 到𪜶倒佇我的腳下。

³⁹ 你賜我氣力互我𠢕交戰； 你互攻擊我的人攏降服佇我下面。

⁴⁰ 你互我的對敵越轉身逃走， 閣互我剿滅怨恨我的人。

⁴¹ 𪜶求叫，無人救𪜶； 求叫上主，伊嘛無應。

⁴² 我給𪜶搥到碎碎，親像土粉互風吹散， 給𪜶摒出，親像街路的土糜。

⁴³ 你救我脫離反叛我的人民； 你設立我做列邦的頭。 我毋識的人民會服事我；

⁴⁴ 外邦的人屈身投降， 𪜶一下聽著我的名就順服。

⁴⁵ 外邦的人失膽， 驚惶愕愕惙行出𪜶的陣地。

⁴⁶ 上主永遠活啲！ 願我倚靠的石磐受稱讚； 願救我的上帝受高舉。

⁴⁷ 伊就是為我申冤彼位上帝； 伊互眾人降服佇我腳下。

⁴⁸ 伊救我脫離我的對敵。 上主啊，你提拔我高過攻擊我的人； 你救我脫離強暴的人。

⁴⁹ 上主啊，因為按呢我欲佇列邦中感謝你， 唱歌稱讚你的名。

⁵⁰ 上主賜極大的救恩互伊設立的王， 施落慈愛互伊抹油選立的人， 互大闢及伊的後代，直到永遠。