Si-phian 17 - 現代台語譯本漢字版

無辜的人的祈禱

大闢的祈禱。

¹ 上主啊，求你聽公道的訴求， 留心聽我的祈禱。 我無用奸詐的嘴唇祈禱， 求你俯耳孔來聽。

² 求你用目睭看出是非； 求你判我無罪。

³ 你有考驗我的心，連暝時嘛監察我； 你用火鍛鍊我，無尋著什麼歹。 我立志無互我的嘴有過失。

⁴ 我遵趁你所講的話，無親像別人的行做； 我謹慎無行強暴的人的路。

⁵ 我的腳一直行你的路， 毋曾偏離。

⁶ 上帝啊，我求叫你，因為你會應我； 求你俯耳孔聽我的祈禱。

⁷ 求你顯出你奇妙不變的疼， 用正手救倚靠你的人脫離𪜶的對敵。

⁸ 求你保護我，親像保護目睭仁， 遮蓋我佇你翼下。

⁹ 求你互我脫離搶劫我的歹人， 脫離圍困我欲害我性命的對敵。

¹⁰ 𪜶塞密憐憫的心； 𪜶的嘴講驕傲自大的話。

¹¹ 𪜶追趇我，現在圍困我； 𪜶直直相欲給我摔倒佇土腳。

¹² 𪜶親像獅數想欲拆碎我， 親像猛獅埋伏啲當等。

¹³ 上主啊，求你起來對付我的對敵，互𪜶屈服， 用你的刀救我的性命脫離歹人。

¹⁴ 上主啊，求你用你的手救我脫離世間人， 脫離佇現世享樂的世間人。 你用你的財物脹滿𪜶的腹肚， 連𪜶的子兒嘛脹甲飽飽， 閣有賰，通留互𪜶的子孫。

¹⁵ 若是我，我會看見你的面，因為我的行為正直； 我睏醒的時，你的臨在會互我滿足。