Si-phian 16 - 現代台語譯本漢字版

信靠的祈禱

大闢的金詩。

¹ 上帝啊，求你保護我， 因為你是我的避難所。

² 我曾對上主講：「你是我的主； 只有你是我幸福的源頭。」

³ 地上的聖徒實在真尊貴； 及𪜶做夥是我上大的歡喜。

⁴ 去隨別個神明的人一定加添痛苦！ 我毋參與𪜶的獻祭， 嘛毋敬拜𪜶的神明。

⁵ 上主，你是我的產業，我的福杯； 你顧守我應得的份額。

⁶ 你將真媠的土地分互我； 我得著的產業實在真好！

⁷ 我欲稱讚教示我的上主； 暝時，我的心指點我。

⁸ 我不時感受上主的同在； 伊佇我的正旁，我𣍐動搖。

⁹ 所以，我的心歡喜，我的神快樂； 我的肉體安然自在。

¹⁰ 因為你𣍐給我放拺佇陰府， 嘛𣍐互你忠誠的子民落去深淵。

¹¹ 你會指示我活命的道路。 佇你面前，我有滿滿的歡喜； 佇你正旁，我有永遠的快樂。