Si-phian 148 - 現代台語譯本漢字版

宇宙攏著稱讚上主

¹ 哈利路亞，稱讚上主！ 恁著對天頂稱讚上主， 佇高的所在謳咾伊。

² 伊的眾使者啊，恁著稱讚伊。 伊的眾天軍啊，恁著謳咾伊。

³ 日及月啊，恁著稱讚伊； 發光的星辰啊，恁攏著謳咾伊。

⁴ 天頂的天，及天頂面的水啊， 恁著謳咾伊。

⁵ 諸個攏著稱讚上主的名， 因為伊一下命令，一切就造成。

⁶ 伊將諸個安置好勢，永遠𣍐變遷； 伊定規例，永遠𣍐廢無。

⁷ 恁著對地上稱讚上主； 大魚及所有的深海，

⁸ 熠爁及冰雹，雪及雲霧， 聽伊的話的狂風， 恁攏著稱讚上主！

⁹ 所有的大山及小山， 果子樹及柏香樹，

¹⁰ 所有的野獸及牲生， 蟲𧒴及飛鳥， 恁攏著稱讚上主！

¹¹ 地上所有的君王及人民， 貴族及統治者，

¹² 少年人及在室女， 老人及囝仔， 恁攏著稱讚上主！

¹³ 恁諸個攏著稱讚上主的名， 因為只有伊的名受尊崇， 伊的榮光𨃟過天及地。

¹⁴ 伊互伊的子民強盛， 互伊聖的子民攏稱讚伊， 就是許個親近主的以色列子民。 哈利路亞，稱讚上主！