Si-phian 146 - 現代台語譯本漢字版

稱讚公義的上主

¹ 哈利路亞，稱讚上主！ 我的心神啊，著稱讚上主！

² 我一生欲稱讚上主； 我活的日攏欲唱歌稱讚我的上帝。

³ 毋通倚靠君王； 毋通倚靠會死的人，𪜶𣍐當幫贊。

⁴ 𪜶一下斷氣就歸土； 𪜶的計劃佇彼日就落空。

⁵ 靠雅各的上帝幫贊的人真有福氣！ 上主 — 𪜶的上帝是𪜶的向望。

⁶ 伊創造天、地、海， 嘛創造其中萬物。 伊永遠信實。

⁷ 伊為著受枉屈的人申冤； 伊賜食物互枵餓的人。 上主解放受關監的人；

⁸ 上主互盲人會看見。 上主扶起受壓制的人； 上主疼惜義人。

⁹ 上主保護出外人， 扶持孤兒寡婦。 伊互歹人的路行𣍐通。

¹⁰ 上主會永遠作王； 錫安啊，你的上帝欲作王，直到萬代！ 哈利路亞，稱讚上主！