Si-phian 143 - 現代台語譯本漢字版

求幫贊的祈禱

大闢的詩。

¹ 上主啊，求你聽我的祈禱， 俯耳孔聽我的懇求， 照你的信實，照你的公義應答我。

² 求你毋通審問你的僕人， 因為佇你面前，活啲的人無一個是義人。

³ 對敵窘迫我， 將我徹底拍倒佇土腳， 互我𫢶佇烏暗的所在，親像死真久的人，

⁴ 致到我的心神失志，強欲暈去； 我的心驚甲愣去。

⁵ 我會記得古早的日， 數念你一切的作為， 靜靜想你手的所做。

⁶ 我向你攑手； 我的心渴慕你親像曠旱的地聽候雨水。

⁷ 上主啊，求你趕緊應答我； 我的心神聽候你到欲暈去。 毋通面越走毋插我， 才免我親像死去的人。

⁸ 求你互我早起時聽見你慈愛的聲， 因為我倚靠你。 求你互我知應該行的路， 因為我的心仰望你。

⁹ 上主啊，求你解救我脫離我的對敵， 互我通走去匿佇你遐。

¹⁰ 你是我的上帝，求你教示我遵行你的旨意。 願你良善的神引導我行平坦的路。

¹¹ 上主啊，求你因為你的名互我閣活起來， 照你的公義引導我脫出患難。

¹² 求你照你的慈愛消滅我的對敵， 剿滅所有苦楚我的人， 因為我是你的僕人。