Si-phian 141 - 現代台語譯本漢字版

夕拜的詩

大闢的詩。

¹ 上主啊，我求叫你； 求你緊來幫贊我！ 我求叫你的時， 求你俯耳孔聽我的聲。

² 願我的祈禱親像香淐到你面前； 願我攑起的雙手，親像下昏時的祭祀受你接納。

³ 上主啊，求你約束我的嘴， 看守我嘴的門。

⁴ 求你毋通互我的心偏向邪惡， 及做歹的人鬥陣做歹； 毋通互我及𪜶仝桌飲食。

⁵ 寧可互義人用仁慈拍我，指正我， 嘛毋互歹人佇我頭殼抹油歡迎我。 雖然歹人做歹，猶久我欲繼續祈禱。

⁶ 𪜶的執政者受㧒落山崁， 𪜶就會知我的話是真實。

⁷ 親像土互犁犁散， 𪜶的骨頭會散甲歸墓口。

⁸ 至高的上主啊，我注目看你； 求你保護我免致到死亡。

⁹ 求你保護我免陷落𪜶給我設的羅網， 以及做歹的人的圈套。

¹⁰ 求你互歹人陷落家己的羅網， 互我安全脫離。