Si-phian 140 - 現代台語譯本漢字版

祈求上主保護

大闢的詩，交互聖樂長。

¹ 上主啊，求你救我脫離歹人， 保護我脫離兇惡的人。

² 𪜶心內圖謀邪惡， 不時製造紛爭。

³ 𪜶的舌親像毒蛇的舌赫呢利； 𪜶的嘴唇有毒蛇的毒。

⁴ 上主啊，求你保守我脫離歹人的手， 保護我脫離強暴的人； 𪜶圖謀欲給我捙倒。

⁵ 驕傲的人暗中掘陷阱，張羅網， 佇路邊設圈套欲害我。

⁶ 我對上主講：「你是我的上帝。」 上主啊，求你俯耳孔聽我懇求的聲。

⁷ 至高的上主 — 我大氣力的拯救者啊， 佇交戰的時，你有保護我。

⁸ 上主啊，求你毋通互歹人的心願實現， 毋通互𪜶的計謀成功，致到自高。

⁹ 毋通互圍困我的人勝利； 著互𪜶嘴唇的毒害害著𪜶家己。

¹⁰ 求你用啲𤏸的火炭降落佇𪜶身上； 給𪜶㧒落火，擲佇深坑，𣍐閣起來。

¹¹ 求你互製造是非的人佇地上徛𣍐牢， 著互災禍給強暴的人隨牢牢，攏給𪜶拍倒。

¹² 我知上主會為著困苦的人申冤， 為著散赤人主持公道。

¹³ 義人一定會感謝你； 正直的人會當佇你面前徛起。