Si-phian 139 - 現代台語譯本漢字版

無所不知、無所不在的上主

大闢的詩，交互聖樂長。

¹ 上主啊，你有監察我，識我。

² 我的一舉一動你攏知； 對真遠你嘛看會出我的心思。

³ 我行路，我歇睏，你攏啲看； 我的所行所做，你嘛攏知。

⁴ 上主啊，我猶未開嘴， 你已經知我欲講什麼。

⁵ 你佇我的前後照顧我； 你親手保護我。

⁶ 你的知識赫呢奇妙， 赫呢高深，超過我的了解。

⁷ 去叨位，我才會當逃避你？ 走到叨位，我才會當逃閃你？

⁸ 我若𬦰上天，你佇遐； 我若落陰府，你嘛佇遐。

⁹ 我若搋翼飛去日出彼旁， 抑是歇佇日落此旁，

¹⁰ 就若佇遐，你的手嘛會引導我， 你的正手嘛會扶持我。

¹¹ 我若求烏暗給我蓋起來， 叫暗暝給我遮截，

¹² 對你來講，烏暗無算是暗， 暗時親像日時赫呢光； 對你來講，烏暗及光明攏仝款。

¹³ 你造我的臟腑； 我佇老母的腹肚內，你給我塑造。

¹⁴ 我感謝你，因為我的受造奇妙通驚畏。 你的作為奇妙； 我的一切你完全知。

¹⁵ 我佇人看𣍐著的所在受造， 佇老母的腹肚內，你給我塑造； 我形成的過程你攏清楚。

¹⁶ 我未成形的身軀， 你已經看著。 你為著我安排的日子， 攏已經記佇你的冊。

¹⁷ 上帝啊，你的意念實在真了解！ 你的心思實在𣍐算得！

¹⁸ 我若欲算，比海沙較多； 若算會了，嘛𣍐當透徹你的奧妙。

¹⁹ 上帝啊，我偌仔呢愛你消滅歹人； 我偌仔呢向望強暴的人離開我。

²⁰ 𪜶講歹話褻瀆你； 你的對敵用邪惡的話侮辱你。

²¹ 上主啊，怨恨你的人我豈無怨恨𪜶？ 起來反叛你的人我豈無厭惡𪜶？

²² 我深深怨恨𪜶， 看𪜶做我的對敵。

²³ 上帝啊，求你監察我，知我的心思， 考驗我，知我的意念。

²⁴ 求你指點我，互我無歹行為， 導我行永遠的道路。