Si-phian 135 - 現代台語譯本漢字版

稱讚的詩

^1-2 哈利路亞，稱讚上主！ 著稱讚上主的名！ 恁諸個佇上主的殿啲侍奉， 佇咱上帝聖殿的埕啲侍奉的僕人啊， 恁攏著稱讚伊。

³ 著稱讚上主，因為上主至善； 著唱歌謳咾伊的名，因為伊仁慈。

⁴ 因為上主揀選雅各歸屬伊家己， 揀以色列做伊的產業。

⁵ 我知上主偉大； 咱的主超越攏總的神明。

⁶ 上主佇天頂及地上，佇海中及所有的深淵， 攏照家己的意思做代誌。

⁷ 伊互雲霧對天邊海角淐出來， 互熠爁帶雨出現， 互風對伊的倉庫吹出來。

⁸ 伊將頭上生的埃及人及牲生 攏拍死。

⁹ 埃及啊，伊佇恁的中間行神跡奇事， 對付法老及伊的人臣。

¹⁰ 伊拍敗真多邦國， 拍敗強猛的國王，

¹¹ 就是亞摩利王西宏 及巴珊王噩， 閣征服迦南所有的王國。

¹² 伊將𪜶的土地互伊家己的子民， 互以色列做產業。

¹³ 上主啊，你的名留到永遠； 上主啊，萬世代的人攏會記念你，

¹⁴ 因為上主欲為著伊的子民申冤， 欲憐憫伊的僕人。

¹⁵ 外邦的偶像是人的手 用銀，用金所鑄造；

¹⁶ 𪜶有嘴，𣍐講話； 有目睭，嘛𣍐看見；

¹⁷ 有耳孔，𣍐聽見； 有嘴，嘛無氣。

¹⁸ 造𪜶的，倚靠𪜶的， 攏及𪜶仝款。

¹⁹ 以色列家啊，著稱讚上主。 亞倫祭司的家啊，著稱讚上主。

²⁰ 利未的家啊，著稱讚上主； 敬畏上主的人啊，著稱讚上主。

²¹ 上主徛起佇耶路撒冷； 願伊對錫安受稱讚。 哈利路亞，稱讚上主！