Si-phian 118 - 現代台語譯本漢字版

為勝利感謝上主

¹ 著感謝上主，因為伊至善； 伊的慈愛續到永遠！

² 願以色列講： 「伊的慈愛續到永遠！」

³ 願亞倫祭司的家講： 「伊的慈愛續到永遠！」

⁴ 願所有敬畏上主的人講： 「伊的慈愛續到永遠！」

⁵ 佇危急的時，我求叫上主， 上主就應答我，解救我。

⁶ 上主及我同在，我𣍐驚惶； 人會當給我按怎？

⁷ 上主為我，做我的幫贊； 我會看著我的對敵受報應。

⁸ 尋上主做避難所 比倚靠人較好！

⁹ 尋上主做避難所 比倚靠統治者較好！

¹⁰ 列國給我包圍， 我奉上主的名給𪜶剿滅！

¹¹ 𪜶包圍我，對四面圍困我； 我奉上主的名給𪜶剿滅！

¹² 𪜶親像蜂給我包圍， 親像火燒莿按呢燒我； 我奉上主的名給𪜶剿滅！

¹³ 𪜶出力捙我，互我險跋倒， 毋拘上主幫贊我。

¹⁴ 上主是我的氣力，我欲唱歌稱讚； 伊給我解救。

¹⁵ 佇上主子民的布棚內有凱旋的歡呼： 「上主的正手顯出大權能！

¹⁶ 上主的正手攑高高； 上主的正手顯出大權能！」

¹⁷ 我𣍐致到死，會活落去， 通講起上主的作為。

¹⁸ 上主嚴嚴管教我， 總是無互我致到死。

¹⁹ 給我開公義的門， 互我通入去感謝上主。

²⁰ 此個門是上主的門， 只有正直的人會當入去。

²¹ 上帝啊，你有應答我，我欲感謝你， 因為你互我得著解救。

²² 起厝師傅棄拺的石， 已經成做上重要的基石。

²³ 這是上主的作為； 咱看起來感覺真奇妙。

²⁴ 這是上主所定的日子； 咱著歡喜，著慶祝！

²⁵ 上主啊，阮求你，求你解救阮！ 上主啊，阮求你，求你互阮興旺！

²⁶ 奉上主的名來彼位應該受稱讚！ 阮對上主的殿祝福你。

²⁷ 上主是上帝， 伊互咱光明。 著攑樹枝參加慶典， 遊行來到祭壇的四角頭遐。

²⁸ 你是我的上帝，我欲感謝你； 你是我的上帝，我欲宣揚你的偉大。

²⁹ 著感謝上主，因為伊至善； 伊的慈愛續到永遠。