Si-phian 116 - 現代台語譯本漢字版

感謝上主的解救

¹ 我疼上主， 因為伊聽我的聲，聽我的懇求。

² 伊俯耳孔聽我， 所以我一世人欲求叫伊。

³ 死亡的索捆縛我； 陰府的痛苦擒牢我。 我有抵著患難憂苦。

⁴ 我求叫上主的名，講： 「上主啊，求你救我的性命。」

⁵ 上主有恩惠，有公義； 阮的上帝有慈悲。

⁶ 上主保護單純的人； 我悽慘落魄的時，伊有救我。

⁷ 我的心神啊，著回復安寧， 因為上主一直有啲恩待你。

⁸ 主啊，你救我的性命脫離死亡， 互我的目睭無閣流目屎， 互我的腳無閣跋倒。

⁹ 我欲佇上主的面前， 繼續佇活人的地生活。

¹⁰ 我雖然講我受極大的困苦， 我猶原信靠上主。

¹¹ 我曾著急講： 「人攏虛假，𣍐靠得。」

¹² 上主賜我一切的恩惠， 我著按怎報答伊？

¹³ 我欲捧救恩的杯， 求叫上主的名。

¹⁴ 我欲佇伊所有子民的面前， 對上主謝我的願。

¹⁵ 上主看伊聖的子民的死 極其毋甘。

¹⁶ 上主啊，我實在是你的僕人； 是你的僕人，你女婢的子； 你已經解開捆縛我的索。

¹⁷ 我欲對你獻感謝的祭， 欲求叫上主的名。

^18-19 佇伊所有子民的面前， 佇上主殿的埕內面， 佇耶路撒冷， 我欲對上主謝我的願。 哈利路亞，稱讚上主！