Si-phian 115 - 現代台語譯本漢字版

獨一的真神上帝

¹ 上主啊，榮光只有歸互你，只有歸互你， 因為你的慈愛及信實，願榮光歸互你。

² 你哪欲互外邦人講： 「𪜶的上帝佇叨位？」

³ 阮的上帝佇天頂， 攏照伊的旨意做代誌。

⁴ 𪜶的偶像是人的手 用銀，用金鑄造的；

⁵ 𪜶有嘴，𣍐講話； 有目睭，嘛𣍐看見。

⁶ 𪜶有耳孔，𣍐聽見； 有鼻孔，嘛𣍐鼻著。

⁷ 𪜶有手，𣍐提； 有腳，𣍐行。 𪜶嘛無用嚨喉出聲。

⁸ 造𪜶的，倚靠𪜶的， 攏及𪜶仝款。

⁹ 以色列啊，著倚靠上主； 伊是你的幫贊，你的盾牌。

¹⁰ 亞倫祭司的家啊，著倚靠上主； 伊是恁的幫贊，恁的盾牌。

¹¹ 恁敬畏上主的人啊，著倚靠上主； 伊是恁的幫贊，恁的盾牌。

¹² 上主關心咱，欲賜福互咱， 欲賜福氣互以色列的家， 欲賜福氣互亞倫祭司的家。

¹³ 敬畏上主的人， 無論大細，伊欲賜福互𪜶。

¹⁴ 願上主加添恁的人數， 加添恁及恁的子孫。

¹⁵ 願創造天地的上主 賜福氣互恁。

¹⁶ 天只有屬上主； 伊將地賜互世間人。

¹⁷ 死人𣍐稱讚上主； 落去永遠靜默的所在的人嘛攏𣍐。

¹⁸ 總是阮欲稱讚上主， 對現在直到永遠。 哈利路亞，稱讚上主！