Si-phian 112 - 現代台語譯本漢字版

敬畏上帝的人有福氣

¹ 哈利路亞，稱讚上主！ 敬畏上主，深深意愛伊誡命的， 此款人真有福氣！

² 𪜶的子孫佇以色列地一定強盛； 正直的人的後代一定受祝福。

³ 𪜶的家內充滿財富； 𪜶的好行為存到永遠。

⁴ 正直的人佇烏暗中有光啲照𪜶； 𪜶有恩惠，有憐憫，有公義。

⁵ 慷慨借人閣公正處理家己的代誌的， 此款人事事順利。

⁶ 義人絕對𣍐失敗； 𪜶永遠互人數念。

⁷ 歹消息，𪜶攏毋驚， 因為心堅定，倚靠上主。

⁸ 𪜶的心自在，攏𣍐驚惶， 最後會看著對敵互上主拍敗。

⁹ 𪜶慷慨賑濟散赤人； 𪜶的好行為存到永遠。 𪜶的頭會當攑高，受人尊敬。

¹⁰ 歹人看了大受氣， 咬牙切齒，向望攏無去。 歹人的心願攏落空。