Si-phian 109 - 現代台語譯本漢字版

祈求報應歹人

大闢的詩，交互聖樂長。

¹ 我所稱讚的上帝啊，求你毋通靜靜，

² 因為邪惡奸詐的人開嘴攻擊我； 𪜶用白賊的舌對我講話。

³ 𪜶用怨恨的話包圍我， 無緣無故攻擊我。

⁴ 我疼𪜶，𪜶反轉做我的對敵； 我猶久為𪜶祈禱。

⁵ 𪜶對我用歹報好， 用怨恨報仁愛。

⁶ 求你派一個歹人管轄伊， 派一個對敵徛佇伊正旁控告伊。

⁷ 求你互伊佇審判的時受定罪， 互伊的祈禱嘛算做罪。

⁸ 求你互伊的性命緊結束， 互別人代替伊的職位。

⁹ 求你互伊的子兒變做孤兒， 互伊的某變做寡婦。

¹⁰ 求你互伊的子兒四界求乞， 對𪜶的破厝互人趕出去。

¹¹ 求你互債主搶伊一切所有， 互生份人搶奪伊勞苦得著的財物。

¹² 求你互伊無得著好款待， 無人可憐伊的孤兒。

¹³ 求你互伊的後代斷絕， 𪜶的名字受擦消，無傳到下一代。

¹⁴ 求上主會記得伊祖先的罪惡， 互伊老母的罪過無得著擦消。

¹⁵ 求上主互𪜶的罪惡不時佇你面前， 互𪜶的名對世間消滅。

¹⁶ 因為伊無想欲施憐憫， 反轉壓迫散赤困苦的人， 害死傷心的人。

¹⁷ 伊愛咒詛，願咒詛臨到伊； 伊無愛祝福，願祝福離開伊遠遠。

¹⁸ 伊用咒詛做衫穿， 咒詛就親像水入伊的腹內， 親像油入伊的骨。

¹⁹ 願此個咒詛做衣服穿佇伊身軀， 做腰帶不時給伊縖牢牢。

²⁰ 這就是伊對上主所受的報應； 伊是我的對敵，用歹話攻擊我的性命。

²¹ 至高的上主啊，求你因為你的名的緣故好款待我， 照你至善的慈愛牽救我。

²² 因為我散赤困苦， 我的內心受傷。

²³ 我的歲壽親像日影漸漸斜； 我親像草蜢互人拌掉。

²⁴ 我因為禁食腳頭窩痠軟； 我消瘦落肉。

²⁵ 我受𪜶誹謗； 𪜶看著我就幌頭。

²⁶ 上主 — 我的上帝啊，求你幫贊我， 照你的慈愛拯救我，

²⁷ 互𪜶知這是你親手所做， 是上主你所做的。

²⁸ 𪜶雖然咒詛我，你會賜福互我； 𪜶起來攻擊我的時會抵著見笑， 毋拘你的僕人會歡喜。

²⁹ 求你互我的對敵用凌辱做衫穿， 用見笑做袍幔。

³⁰ 我欲用我的嘴大大感謝上主； 我欲佇眾人的中間稱讚伊。

³¹ 伊欲徛佇散赤人的正旁， 救伊脫離判伊死罪的人。