Si-phian 106 - 現代台語譯本漢字版

上主恩待伊的子民

¹ 哈利路亞，稱讚上主！ 著感謝上主，因為伊至善； 伊的慈愛續到永遠！

² 啥人會曉講起上主的大權能？ 啥人會當完全表明對伊的稱讚？

³ 所有維護公平， 不時實踐公義的人真有福氣！

⁴ 上主啊，你恩待你子民的時，求你會記得我； 你拯救𪜶的時，求你眷顧我。

⁵ 求你互我看見你的選民興旺， 互我及你的國民分享快樂， 及你的子民做夥誇耀。

⁶ 阮及阮的祖先仝款有犯罪； 阮偏離正路做歹。

⁷ 阮的祖先佇埃及無明白你所做的奇事， 𣍐記得你豐盛的慈愛， 反轉佇紅海背叛你。

⁸ 毋拘主，因為伊的名的緣故，解救𪜶， 欲顯明伊的大權能。

⁹ 伊一下喝紅海，海就焦去； 伊導𪜶經過海深的所在，若啲經過焦地。

¹⁰ 伊救𪜶脫離怨恨𪜶的人的手， 對對敵的手中解救𪜶。

¹¹ 𪜶的對敵攏互水淹密， 連一個都無留啲。

¹² 彼陣，𪜶才信伊的話， 才唱歌稱讚伊。

¹³ 𪜶真緊就𣍐記得伊的所做， 無聽候伊的指示。

¹⁴ 𪜶佇曠野大大起貪慾， 佇荒埔試探上帝。

¹⁵ 𪜶所求的，伊有互𪜶， 毋拘嘛互𪜶攏衰荏消瘦。

¹⁶ 𪜶佇營中怨妒摩西 及上主聖別的亞倫。

¹⁷ 地就裂開，吞滅大坍， 掩密亞比蘭彼群人。

¹⁸ 有火佇𪜶中間𤏸起來， 火焰燒滅許個歹人。

¹⁹ 𪜶佇何烈山造牛仔， 仆拜所鑄的像。

²⁰ 按呢，𪜶用食草的牛仔做像， 替換上帝的榮光。

²¹ 𪜶𣍐記得給𪜶拯救的上帝； 伊曾佇埃及做大代誌，

²² 佇含的地行奇事， 佇紅海做通驚的事。

²³ 所以，伊講欲給𪜶消滅； 若毋是伊所揀選的摩西徛佇伊面前極力申訴， 消除伊的受氣，伊已經給𪜶消滅啦。

²⁴ 𪜶看輕彼個好的地， 毋信伊的話；

²⁵ 𪜶佇家己的布棚內埋怨， 毋聽趁上主的話。

²⁶ 所以伊對𪜶攑手立誓， 欲互𪜶死佇曠野；

²⁷ 互𪜶的子孫死佇外國， 四散佇逐所在。

²⁸ 𪜶鬥陣去拜比珥的巴力， 食獻互無性命的神明的祭物。

²⁹ 𪜶按呢做，惹起伊的受氣， 就有瘟疫佇𪜶中間傳染。

³⁰ 彼時非尼哈起來替𪜶排解， 瘟疫就煞。

³¹ 此個代誌上帝給伊算做義， 對彼時起，直到永遠。

³² 𪜶佇米利巴的水泉邊閣惹上主受氣， 為著𪜶的緣故，摩西受連累；

³³ 因為𪜶背叛上帝， 致到摩西講出匆碰的話。

³⁴ 𪜶無聽趁上主的吩咐， 無剿滅外族的百姓；

³⁵ 反轉及外邦人通婚， 學𪜶的所做，

³⁶ 服事𪜶的偶像； 結果家己跋落陷阱。

³⁷ 𪜶將子、查某子做祭物獻互鬼神；

³⁸ 𪜶流無罪的人的血，刣家己的子、查某子， 將𪜶做祭物獻互迦南的偶像， 彼個地就受著血污染。

³⁹ 按呢，𪜶受家己的行為污染， 𪜶的所做犯著淫行。

⁴⁰ 所以，上主對伊的子民發受氣， 厭惡伊的產業以色列。

⁴¹ 伊將𪜶交佇外邦人的手， 互怨恨𪜶的人管轄𪜶。

⁴² 𪜶的對敵壓制𪜶， 𪜶就屈服佇對敵的手下。

⁴³ 上主一遍閣一遍解救𪜶； 毋拘𪜶故意背逆伊， 因為家己的罪惡致到墮落。

⁴⁴ 伊聽著𪜶的哀叫， 體貼𪜶的困苦。

⁴⁵ 伊為著𪜶想起伊的約， 因為豐盛的慈愛回心轉意，

⁴⁶ 互𪜶得著所有掠𪜶的人的憐憫。

⁴⁷ 上主 — 阮的上帝啊，求你拯救阮， 聚集阮，導阮對列國轉來， 互阮通感謝你的聖名， 用稱讚你做阮上大的歡喜。

⁴⁸ 願稱讚歸互上主 — 以色列的上帝， 對永遠到永遠。 願全體人民攏講：阿們！ 哈利路亞，稱讚上主！