Si-phian 105 - 現代台語譯本漢字版

上帝引導伊的子民

¹ 恁著感謝上主，求叫伊的名， 佇萬民中報揚伊的作為。

² 著對伊吟詩，向伊唱歌謳咾， 談論伊一切奇妙的所做。

³ 著誇耀伊的聖名。 願尋求上主的人心內歡喜。

⁴ 著倚靠上主及伊的權能， 不時尋求見伊的面。

^5-6 伊的僕人亞伯拉罕的後代， 伊所揀雅各的子孫啊， 恁著數念伊奇妙的作為， 數念伊的神跡及伊所講判斷的話。

⁷ 伊是上主 — 咱的上帝； 伊的審判普及全地。

⁸ 伊會記得伊的約直到永遠， 伊的應允直到萬代。

⁹ 伊會記得及亞伯拉罕立的約， 對以撒所立的誓。

¹⁰ 伊將此個約互雅各做規例， 互以色列做永遠的約。

¹¹ 伊講：「我欲將迦南地賜互你， 做你應得的產業。」

¹² 當時𪜶的人口有限，人數真少； 𪜶佇遐做出外人。

¹³ 𪜶對此族行到彼族， 對此國到彼國。

¹⁴ 伊無容允人壓迫𪜶； 為著𪜶的緣故，伊譴責許個君王。

¹⁵ 伊講：「毋通磕著我揀選的僕人， 嘛毋通欺負我的先知。」

¹⁶ 伊互飢荒降落佇彼個土地， 互所倚靠的米糧攏斷絕。

¹⁷ 伊差一個人先去， 就是受賣做奴隸的約瑟。

¹⁸ 人用腳銬銬伊的腳， 用鐵鍊鍊伊的頷頸。

¹⁹ 上主的話給伊考驗， 直到伊的預言實現。

²⁰ 王差人給伊解開； 統治萬民的法老給伊解放。

²¹ 王設立伊做宰相， 掌管法老攏總的財物，

²² 通隨意縛伊的人臣， 用智慧管教伊的長老。

²³ 以色列嘛來到埃及； 雅各出外佇含的地。

²⁴ 上主互伊的子民生湠真多， 互𪜶比對敵較強。

²⁵ 伊改變對敵的心，互𪜶怨恨伊的子民， 用詭詰的計謀對待伊的僕人。

²⁶ 伊差伊的僕人摩西， 及伊所揀的亞倫，

²⁷ 佇對敵的中間行伊的神跡， 佇含的地行奇事。

²⁸ 伊降落烏暗，地就暗摸摸； 埃及人猶久毋聽趁伊的話。

²⁹ 伊互𪜶的水變做血， 水內的魚攏死。

³⁰ 佇𪜶的土地田蛤仔滿滿是， 連王的房間都有。

³¹ 伊一下出聲，胡蠅歸陣飛來， 閣佇𪜶的境內有蝨母滿四界。

³² 伊落雹代替雨， 降落熠爁佇𪜶全地。

³³ 伊掃倒𪜶的葡萄樹及無花果樹， 毀壞𪜶境內的樹木。

³⁴ 伊一下出聲，歸群的草蜢及草蜢仔子就飛來， 多甲𣍐算得，

³⁵ 給𪜶土地的菜蔬食了了， 閣吞食𪜶的田園所出的五穀。

³⁶ 伊拍死𪜶國內所有的大子， 就是𪜶勇壯的時所生的。

³⁷ 伊導𪜶出來，帶銀帶金； 伊的支族中無一個軟弱。

³⁸ 𪜶出來的時，埃及人大歡喜， 因為埃及人真驚𪜶。

³⁹ 伊用雲給𪜶遮， 暝時用火給𪜶照。

⁴⁰ 𪜶一下求，伊就互鵪鶉飛來， 閣用天的食物互𪜶飽足。

⁴¹ 伊拍開石磐，水就淐出來， 成做河流流過曠野。

⁴² 因為伊會記得伊聖的應允， 會記得伊的僕人亞伯拉罕。

⁴³ 伊導伊的子民歡歡喜喜出來， 導伊揀選的子民唱歡喜的歌向前行。

⁴⁴ 伊將列國的土地賜互𪜶， 互𪜶承接別個民族勞苦得著的財富，

⁴⁵ 通互𪜶遵趁伊的規例， 遵守伊的律法。 哈利路亞，稱讚上主！