Si-phian 104 - 現代台語譯本漢字版

頌讚創造主

¹ 我的心神啊，著稱讚上主。 上主 — 我的上帝啊，你至大！ 你用尊榮威嚴做衫穿；

² 你用光做外袍幔。 你搋開天親像啲搭布棚；

³ 你佇水頂安置宮殿的樑。 你用雲做車坐， 用風做翼飛。

⁴ 你用風做使者， 用火焰做差用。

⁵ 你將地下佇地基頂， 互地永遠𣍐搖泏。

⁶ 你互深水若外衫遮蓋地面， 互水淹過山嶺。

⁷ 你一下喝，水就趕緊走； 你的雷一下彈，水就緊緊流，

⁸ 淐到山頭，落到山谷， 流到你給𪜶定的所在。

⁹ 你定界限互水𣍐𨃟過， 𣍐閣轉來淹地面。

¹⁰ 你互水泉對山內淐出， 流落山谷，

¹¹ 互山內的走獸有水通飲， 互野驢止嘴焦。

¹² 你互空中的飛鳥歇佇水邊， 佇樹枝頂唱歌。

¹³ 你對天頂的宮殿用水灌沃山嶺， 對你所做的效果，地得著富足。

¹⁴ 你互草生長，通互牲生食， 互菜蔬大欉，做人的路用， 通互人對地得著食物；

¹⁵ 閣有酒互人的心歡喜； 有油互人的面光彩； 有食物互人勇壯有力。

¹⁶ 上主所栽種黎巴嫩的柏香樹， 攏得著充足的潤澤；

¹⁷ 有飛鳥作巢佇遐的樹內面； 有鶴佇松樹的樹枝作巢。

¹⁸ 有高山互野山羊住； 有石縫做石貛匿的所在。

¹⁹ 伊用月定季節， 互日頭知通落山。

²⁰ 你互日暗做暝時； 彼時樹林內的百獸就攏爬出來。

²¹ 獅仔豚哮欲尋物食， 對上帝討食物。

²² 日頭一下出，𪜶就走去匿， 佇𪜶的洞內歇睏。

²³ 人出去做工， 勞動到下昏時。

²⁴ 上主啊，你所造的哪赫呢多， 攏是你用智慧所造； 全地滿滿攏是你的創造。

²⁵ 佇遐有海，大閣闊， 內面有算𣍐了的動物； 大細的活物攏有。

²⁶ 佇遐有船啲行， 有你所創造的海獸泅來泅去。

²⁷ 諸個攏啲靠你， 你照時互𪜶食物。

²⁸ 你㧒互𪜶，𪜶就拾起來； 你搋開手，𪜶就有好物食到飽。

²⁹ 你面越走毋看𪜶，𪜶就煩惱驚惶； 你將𪜶的氣收回，𪜶就死去歸回土粉。

³⁰ 你一下歕氣，𪜶就受創造； 你互地面攏換新。

³¹ 願上主的榮光永遠存續； 願上主因為家己的創造歡喜。

³² 伊看地，地就振動； 伊摸山，山就淐煙。

³³ 我欲一世人對上主吟詩； 我猶活啲的時欲對我的上帝唱歌謳咾。

³⁴ 願伊歡喜接納我的默想。 我欲因為上主歡喜快樂。

³⁵ 願罪人對世上消滅； 願歹人攏無去。 我的心神啊，著稱讚上主。 哈利路亞，稱讚上主！