Si-phian 103 - 現代台語譯本漢字版

上帝的慈愛

大闢的詩。

¹ 我的心神啊，著稱讚上主！ 著用全部的心神謳咾伊的聖名！

² 我的心神啊，著稱讚上主！ 毋通𣍐記得伊一切的恩惠。

³ 伊赦免你攏總的罪， 醫好你一切的病。

⁴ 伊救你脫離死亡的陷坑， 用慈悲及仁愛做花冠賜互你。

⁵ 伊用逐款好物互你一世人滿足， 互你回復少年親像鷹鳥赫呢勇壯。

⁶ 上主執行公義； 伊為著一切受壓制的人申冤。

⁷ 伊用伊的道路指示摩西， 用伊的作為指示以色列人。

⁸ 上主有慈悲，有仁愛， 𣍐快受氣，有豐盛的慈愛。

⁹ 伊𣍐久長責備， 𣍐永遠囥受氣。

¹⁰ 伊𣍐照咱的罪過責罰咱， 嘛𣍐照咱的罪孽報應咱。

¹¹ 天離開地有偌高， 伊的慈愛對敬畏伊的人嘛赫呢大。

¹² 東離開西有偌遠， 伊互咱的罪過離開咱嘛赫呢遠。

¹³ 老父按怎疼惜家己的子兒， 上主嘛會按呢疼惜敬畏伊的人。

¹⁴ 因為伊知影咱受造的本質； 伊會記得咱不過是土粉。

¹⁵ 人咧，𪜶的性命親像草； 𪜶親像野花生長茂盛，

¹⁶ 風一下吹就消失； 無人會閣看著。

¹⁷ 毋拘上主永遠疼惜敬畏伊的人； 伊用公義對待𪜶的子子孫孫，

¹⁸ 就是許個遵守伊的約， 忠實遵行伊律例的人。

¹⁹ 上主佇天頂設立寶座； 伊的主權普及萬有。

²⁰ 有大權能的天使， 聽趁上帝的話，執行伊命令的使者啊， 恁攏著稱讚上主！

²¹ 所有的天軍，執行伊旨意的差使啊， 恁攏著稱讚上主！

²² 佇伊掌權逐所在所有的被造物啊， 恁攏著稱讚上主！ 我的心神啊，著稱讚上主！