Si-phian 102 - 現代台語譯本漢字版

患難中的祈禱

困苦的人軟弱的時佇上主面前祈禱，吐出苦情。

¹ 上主啊，求你聽我的祈禱， 互我求叫的聲透到你的面前。

² 我佇危急的日，毋通面越走毋看我； 求你俯耳孔聽我。 我求叫的時，求你隨時應我。

³ 因為我的性命親像煙消散； 我的骨頭親像柴佇火爐內啲燒。

⁴ 我的心受傷，親像草焦去， 連飯都無愛食。

⁵ 我吐氣哼哼呻； 我消瘦落肉。

⁶ 我親像曠野的鵜鶘， 親像荒埔的暗光鳥。

⁷ 我歸暝無睏， 親像厝頂孤單的鳥仔。

⁸ 我的對敵歸日侮辱我； 恥笑我的人用我給人咒詛。

⁹ 我用火灰準飯食， 所飲的攏摻目屎。

¹⁰ 這是因為你起性地發受氣， 給我夯起來閣㧒落去。

¹¹ 我的性命親像日斜， 親像草焦去。

¹² 只有上主你永遠存在， 互人記念到萬代。

¹³ 你欲起來憐憫錫安； 因為現在是施恩的時， 指定的日已經到。

¹⁴ 你的僕人意愛錫安的石頭， 連伊的土粉都保惜。

¹⁵ 列國會敬畏上主的名； 世上的君王攏會敬畏你的榮光。

¹⁶ 因為上主重建錫安的時， 欲佇伊的榮光中顯現。

¹⁷ 伊俯落聽散赤人的祈禱， 𣍐看輕𪜶的懇求。

¹⁸ 著為著後代的人記載上主的作為， 互將來出世的人通稱讚伊。

¹⁹ 上主對至高的聖所看落來， 對天頂看落地。

²⁰ 伊欲聽囚犯的吐氣， 欲解救受判死刑的人，

²¹ 互人通佇錫安傳揚上主的名， 佇耶路撒冷傳播稱讚伊的話；

²² 彼時列國會聚集， 萬民會服事上主。

²³ 伊互我的氣力未老先衰， 互我的性命縮短。

²⁴ 我講：「我的上帝啊，毋通佇我中年的時討我的性命。」 你的年日到萬世代無窮盡！

²⁵ 你佇起頭給地下地基； 天嘛是你親手創造。

²⁶ 天地攏會消失，毋拘你永遠存在。 𪜶會親像衫穿破去； 你會給𪜶替換親像換衫， 𪜶就無去。

²⁷ 只有你𣍐改變； 你的歲壽無窮盡。

²⁸ 願你僕人的子孫久長安穩徛起， 𪜶的後代佇你面前堅固徛在。