Si-phian 10 - 現代台語譯本漢字版

¹ 上主啊，你哪會徛遠遠？ 患難的時，你哪會匿啲毋插阮？

² 歹人驕傲瘋狂，給困苦的人趇牢牢； 著互𪜶陷落家己所設的計謀。

³ 歹人誇口𪜶心內的慾望； 貪心的人褻瀆上主，藐視伊。

⁴ 歹人驕傲，心中無上帝， 講：「上主𣍐追究。」

⁵ 歹人的所做事事順利； 上帝的審判，𪜶無看在眼內。 所有的對敵，𪜶攏藐視。

⁶ 歹人心內講：「阮一定𣍐失敗， 世世代代𣍐抵著災難。」

⁷ 歹人滿嘴咒罵、奸詐、恐嚇； 𪜶的舌惡毒、虛假。

⁸ 𪜶佇庄內埋伏啲當等， 目睭直直啲相無依倚的人； 𪜶匿佇隱密的所在欲殺害無辜的人。

⁹ 𪜶埋伏佇隱密的所在，親像獅匿佇穴裡， 當等欲掠散赤人， 用網給𪜶網啲拖去。

¹⁰ 𪜶屈啲當等， 互無依倚的人陷落𪜶的爪牙。

¹¹ 𪜶心內講：「上帝𣍐記得； 伊掩伊的面，永遠𣍐看見。」

¹² 上主啊，求你徛起來， 上帝啊，攑起你的手； 毋通𣍐記得散赤人。

¹³ 歹人是按怎藐視上帝， 心內講伊𣍐追究？

¹⁴ 上主，你有看見， 惡毒、怨妒，你攏有啲監察； 你欲用你的手報應。 無依倚的人將本身交代你； 你一直有啲幫贊孤兒。

¹⁵ 願你拍斷歹人的手骨； 願你徹底追究𪜶的歹。

¹⁶ 上主作王，對永遠到永遠； 列邦攏對伊的地消滅。

¹⁷ 上主啊，散赤人的心願，你會聽； 你欲壯𪜶的膽，俯耳孔聽𪜶的祈求。

¹⁸ 你欲替孤兒及受壓迫的人申冤， 互世間人無閣恐嚇𪜶。