Ngá-ko 8 - 現代台語譯本漢字版

¹ 你若是我的兄弟， 𠲿過阮老母的奶，毋知偌好！ 按呢，我佇外面抵著你，及你唚嘴， 就無人會看輕我。

² 我會導你入去阮老母的厝， 伊會教示我； 我會互你飲調和的酒及石榴的汁。

³ 你用倒手扶我的頭殼， 用正手攬我。

⁴ 耶路撒冷的查某囝仔啊， 我懇切給恁吩咐， 毋通拍醒，毋通攪擾阮的愛情， 到阮歡喜滿足。

第六首 (耶路撒冷的查某囝仔)

⁵ 對曠野上來， 撐佇伊親愛的的身軀彼個是啥人？ 我佇蘋果樹腳給你叫醒； 你的老母佇遐懷孕， 佇遐經過催陣的痛苦生你。

(女)

⁶ 互我親像印，蓋佇你的心內； 親像印，頓佇你的手骨。 因為愛情親像死赫呢有力， 情熱親像陰府赫呢強烈， 所發出的炎熱親像火焰， 親像極猛烈的火焰。

⁷ 大水𣍐當拍化愛情； 溪水𣍐當給伊消滅。 人若用伊所有的財產來買愛情， 一定互人藐視。

(女的兄弟)

⁸ 阮有一個細漢小妹，伊的奶猶未發育成熟； 人來提親， 阮著按怎給伊設法？

⁹ 伊若是牆，阮欲佇伊的頂面起銀塔； 伊若是門，阮欲用柏香柴板給伊圍起來。

(女)

¹⁰ 我是牆，我的奶親像兩個塔； 我親愛的一下看著我，就心滿意足。

(男)

¹¹ 所羅門佇巴力‧哈們有一坵葡萄園； 伊將此坵葡萄園租互顧守的人； 𪜶逐個人為著𪜶的果子著納一千個銀。

¹² 我有葡萄園，是我家己的； 所羅門啊，彼一千你提去， 兩百互顧守果子的人。

¹³ 𫢶佇園內的查某囝仔啊，同伴攏啲聽你的聲， 你嘛互我聽一下。

(女)

¹⁴ 我親愛的啊，趕緊來， 親像羚羊， 親像鹿仔， 來到淐出芳味的山！