Ngá-ko 7 - 現代台語譯本漢字版

(男)

¹ 尊貴的查某囝仔，你穿鞋的腳哪赫媠！ 你大腿的曲線，媠親像珠寶， 是藝術家的傑作。

² 你的肚臍親像杯圓圓， 有調和的酒不時滿墘。 你的腹肚親像歸堆的麥， 有百合花圍啲。

³ 你兩粒奶親像一對鹿仔， 親像鹿母的雙生子。

⁴ 你的頷頸親像象牙的塔， 目睭親像希實本的水池， 佇巴特‧拉併的城門邊。 你的鼻親像黎巴嫩的塔，面向大馬士革。

⁵ 你的頭攑高高親像迦密山， 垂落來的頭毛是紫色， 王的心互伊纏啲。

⁶ 我心愛的，你哪赫媠，赫可愛， 哪赫呢互人意愛！

⁷ 你的身材親像椰棗樹； 你的奶親像歸葩的果子。

⁸ 我講：我欲𬦰起去此欉椰棗樹挽果子。 願你的奶親像歸葩的葡萄， 你的氣親像蘋果赫呢芳，

⁹ 你的嘴親像上好的酒。 願彼個酒流入我親愛的的嘴， 飲了滑喉。

(女)

¹⁰ 我屬我親愛的， 伊所戀慕的是我。

¹¹ 我親愛的啊，來，咱來去野外， 來去庄腳歇暝。

¹² 咱透早起來，來去葡萄園， 看葡萄茁芛開花抑未， 石榴開花抑未； 佇遐我欲將愛情獻互你。

¹³ 催情果出芳味； 佇咱的門邊有逐款真好的果子， 新的舊的攏有； 我親愛的，這攏是我給你保存的。