Ngá-ko 5 - 現代台語譯本漢字版

(男)

¹ 我的小妹，我的新娘啊，我有入去我的園內， 挽我的沒藥及芳料， 食蜜房及蜜， 飲我的酒及奶。 我的朋友，來食，來飲； 盡情來享受愛情。

(耶路撒冷的查某囝仔) 第四首 (女)

² 我啲睏，毋拘心猶精神。 聽咧，我親愛的啲拍門，講： 我的小妹，我的愛人， 我純全的粉鳥，給我開門； 我的頭殼互露水滴霑， 我的頭毛霑漉漉。

(男) (女)

³ 我已經褪衫，著閣穿噢？ 我已經洗腳，著閣拍垃墋噢？

⁴ 我親愛的對門縫伸手入來； 我的心為著伊激動。

⁵ 我起來，欲給我親愛的開門； 沒藥對我的雙手滴落去， 對指頭仔滴落去門閂。

⁶ 我給我親愛的開門； 毋拘我所愛的已經越轉身去啊。 伊抵即講的話，互我神不附體。 我尋伊，尋無；我叫伊，伊無應。

⁷ 城內巡邏的人抵著我， 拍我，傷我； 顧城牆的人將我幔身軀的巾搶去。

⁸ 耶路撒冷的查某囝仔啊，我拜託恁， 恁若抵著我親愛的，著給伊講： 我因為愛情致病。

(耶路撒冷的查某囝仔)

⁹ 你此個查某囝仔中上媠的啊， 你親愛的，比別人親愛的有什麼較好？ 你親愛的，比別人親愛的有什麼較好， 值得阮答應你的要求？

(女)

¹⁰ 我親愛的英俊閣勇壯， 是萬人中的第一。

¹¹ 伊的頭殼若純金； 伊的頭毛艷閣虯，烏親像烏鴉。

¹² 伊的目睭親像歇佇溪邊的粉鳥， 用奶洗過，親像寶石安置好勢。

¹³ 伊的嘴䩃親像花園淐出芳味； 伊的嘴唇親像百合花，滴落真芳的沒藥。

¹⁴ 伊的雙手親像金的柺鑲青玉； 伊的身軀親像光滑的象牙鑲藍寶石。

¹⁵ 伊的雙腳親像大理石的柱，安置佇純金的座； 伊的體格雄偉親像黎巴嫩， 媠親像柏香樹。

¹⁶ 伊的嘴真甜，人人意愛。 耶路撒冷的查某囝仔啊， 伊就是我親愛的，是我的愛人。