Ngá-ko 4 - 現代台語譯本漢字版

(男)

¹ 我的愛人，你真媠，你實在真媠！ 你的目睭親像粉鳥匿佇帕的內面； 你的頭毛親像歸陣山羊倒佇基列的山坪。

² 你的嘴齒親像抵剪毛歸群的羊母， 洗清氣對水裡𬦰起來； 逐隻攏生雙生，無一隻拍損。

³ 你的嘴唇親像朱紅的線； 你的嘴生做真好看； 你的鬢邊佇帕的內面， 親像擘開的石榴。

⁴ 你的頷頸親像大闢的塔堅固好看， 吊滿勇士的盾牌。

⁵ 你兩粒奶親像一對鹿仔， 親像鹿母的雙生子， 佇百合花中啲食草。

⁶ 日涼冷，影伸長的時， 我欲去沒藥的山，及乳香的山頭。

⁷ 我的愛人，你實在真媠， 無一點仔通嫌。

⁸ 我的新娘啊，離開黎巴嫩，及我做夥來去； 對亞瑪拿的山頂，對示尼珥，就是黑門的山頂， 對獅的穴，對豹住的山趕緊落來。

⁹ 我的小妹，我的新娘啊，你有奪我的心； 你目睭一下看， 用你頷頸的一條金鍊仔就給我的心奪去。

¹⁰ 我的小妹，我的新娘，你的愛情哪赫美妙。 你的愛情實在比酒較好； 你膏油的芳味比所有的香料較芳。

¹¹ 我的新娘啊，你的嘴唇甜親像對蜂房滴落來的蜜； 你的舌有蜜有奶； 你的衣服有黎巴嫩的芳味。

¹² 我的小妹，我的新娘，是鎖啲的園， 蓋密的井，封密的水泉。

¹³ 你栽種石榴的園，出真多種上好的果子， 閣有指甲花及哪噠樹。

¹⁴ 有哪噠及番紅花， 菖蒲、肉桂，及乳香， 沒藥、沉香，及一切上等的芳料。

¹⁵ 你是園中的水泉，活水的井， 對黎巴嫩流落來的溪水。

(女)

¹⁶ 北風啊，起來；南風啊，吹來； 吹來我的園，互伊的芳味遍滿逐所在； 互我親愛的入伊的園內， 享受上好的果子。