Ngá-ko 3 - 現代台語譯本漢字版

¹ 我暝時倒佇眠床，我欲尋我心愛的； 我尋伊，尋無。

² 我起來，佇城內四界行， 佇街頭巷尾 尋我心愛的； 我尋伊，毋拘尋無。

³ 城內巡邏的人抵著我， 我問𪜶：恁有看著我心所愛的無？

⁴ 我離開𪜶無偌遠， 就尋著我心愛的。 我給伊擒啲，毋互伊離開； 到我導伊入去阮老母的厝， 就是懷孕我彼間房間。

⁵ 耶路撒冷的查某囝仔啊， 我指羚羊及田野的鹿母，懇切給恁吩咐， 毋通拍醒，毋通攪擾阮的愛情， 到阮歡喜滿足。

第三首 (女)

⁶ 彼個對曠野來，形狀親像火燻的柱， 用沒藥，乳香，及生理人啲賣的芳粉 互伊發出芳味的是啥人？

⁷ 你看，是所羅門的轎， 四圍有六十個勇士， 攏是對以色列勇士中揀的。

⁸ 𪜶攏𠢕用劍，𠢕相戰； 逐個腰縖刀，防備暝時的危險。

⁹ 所羅門王用黎巴嫩的柴， 為家己做一頂轎。

¹⁰ 柱用銀做， 蓋用金做， 坐位用紫色的材料， 內面是用耶路撒冷的查某囝仔的愛情鋪的。

¹¹ 錫安的查某囝仔啊，著出去， 去看所羅門王； 伊戴王冠，伊的老母佇伊結婚快樂的日給伊戴的。