Ngá-ko 2 - 現代台語譯本漢字版

¹ 我是沙崙的玫瑰花， 是山谷的百合花。

(男)

² 我的愛人佇查某囝仔中， 親像莿內的百合花。

(女)

³ 我親愛的佇查甫囝仔中， 親像樹林內的蘋果樹； 我真愛坐佇伊的蔭影下， 伊的果子我食起來真甜。

⁴ 伊導我入宴席廳， 用愛情的旗蓋佇我的頂面，

⁵ 用葡萄乾丸補我的力， 用蘋果贊我的元氣； 我愛伊愛甲破病。

⁶ 伊用倒手扶我的頭殼， 用正手攬我。

⁷ 耶路撒冷的查某囝仔啊， 我指羚羊及田野的鹿母，懇切給恁吩咐， 毋通拍醒，毋通攪擾阮的愛情， 到阮歡喜滿足。

第二首 (女)

⁸ 看咧，我親愛的來啦； 伊𨃟山過嶺趒趒跳跳啲來。

⁹ 我親愛的親像羚羊，親像鹿仔； 你看，伊徛佇牆仔外， 對窗仔啲看， 對窗仔軹啲探。

¹⁰ 我親愛的出聲對我講： 我的愛人，我的美人，起來，咱來去。

(男)

¹¹ 冬天已經過， 雨已經煞。

¹² 花開滿遍地， 鳥仔唱歌的時到啦， 佇田野有聽見斑鴿的聲。

¹³ 無花果漸漸成熟， 葡萄樹開花發出芳味； 我的愛人，我的美人，起來，咱來去。

¹⁴ 我的粉鳥啊，你匿佇石縫內，佇山巖隱密的所在； 求你互我看你的面，聽你的聲； 因為你的聲溫和，你的面真媠。

¹⁵ 給阮掠狐狸， 許個損壞葡萄園的細隻狐狸； 因為阮的葡萄抵仔啲開花。

(女)

¹⁶ 我親愛的是我的，我嘛是伊的； 伊佇百合花中啲飼羊。

¹⁷ 我親愛的啊，你著佇日涼冷，影伸長的時轉來， 親像羚羊，親像鹿仔， 對嵁硈的山嶺倒轉來。