Ngá-ko 1 - 現代台語譯本漢字版

第一首

¹ 所羅門詩歌中的詩歌。

(女)

² 來，用你的嘴給我唚； 你的愛情比酒較好。

³ 你的芳油實在真芳； 你的名親像倒出來的芳油； 所以，無一個查某囝仔無愛你。

⁴ 請牽我，咱緊來走！ 王啊，導我入去你的房間， 咱來歡喜快樂； 你的愛情比酒較好， 莫怪所有的查某囝仔攏愛你。

⁵ 耶路撒冷的查某囝仔啊， 我烏，毋拘生做媠， 親像基達的布棚， 親像所羅門的帳簾。

⁶ 毋通因為我皮膚烏烏直直給我看， 彼是日頭曝的。 我的兄弟對我受氣， 叫我去顧葡萄園； 我煞𣍐當照顧家己的園。

⁷ 我心愛的啊，給我講， 你佇什麼所在啲飼羊，中晝佇叨位互羊歇睏， 我才免佇你同伴的羊群中四界尋你。

(男)

⁸ 查某囝仔中上媠的啊，你若毋知我佇叨位， 隨羊群的腳跡去， 佇牧者的布棚邊飼你的山羊仔。

⁹ 我的愛人，我看你親像法老戰車的馬。

¹⁰ 你鬢邊的妝飾互你的面真媠； 你的頷頸掛真珠鍊真好看。

¹¹ 阮欲給你做金的鍊仔，鑲銀的鈕仔。

(女)

¹² 王坐桌的時， 我的哪噠芳油淐出芳味。

¹³ 我親愛的，你是一包沒藥， 掛佇我的胸前。

¹⁴ 我親愛的，你是一葩指甲花， 佇隱‧基底的葡萄園內啲開。

(男)

¹⁵ 我的愛人，你真媠，實在真媠！ 你的目睭親像粉鳥。

(女)

¹⁶ 我親愛的，你真英俊，我真合意！ 咱用青翠的草埔做床舖，

¹⁷ 用柏香柴做厝的樑， 松柏柴做桷仔。