Hap-kai-su 2 - 現代台語譯本漢字版

新聖殿的榮光

¹ 七月二一，上主通過先知哈該傳話，講：

² 「今，你著給撒拉鐵的子猶大省長所羅巴伯及約薩達的子大祭司耶書亞，以及所賰的人民講：

³ 『恁諸個猶活啲的人，什麼人曾看著此個殿古早的榮光？現在恁看著的是什麼款？佇恁的目睭前豈毋是什麼攏無？』

⁴ 上主講：『所羅巴伯，著堅強！約薩達的子大祭司耶書亞，著堅強！』上主講：『所有住佇此塊地的人民，著堅強！』上主 — 萬軍的統帥閣講：『著做工！我及恁同在！

⁵ 這是根據恁出埃及的時我互恁的應允。我繼續及恁同在。毋免驚！』

⁶ 「上主 — 萬軍的統帥按呢講：『閣無偌久，我欲閣一遍互天、地、海，及焦地攏搖泏。』

⁷ 上主 — 萬軍的統帥講：『我欲互萬國搖泏，互萬國的財寶運來遮，互此個殿充滿榮光。』

⁸ 上主 — 萬軍的統帥講：『銀是我的，金嘛是我的。』

⁹ 上主 — 萬軍的統帥閣講：『新起的殿的榮光會超過早前的殿的榮光。佇此個所在，我欲賞賜和平繁榮。』上主 — 萬軍的統帥按呢宣布。」

先知請教祭司

¹⁰ 大流士坐位第二年九月二十四，上主對先知哈該講：

¹¹ 「上主 — 萬軍的統帥按呢講：『你去見祭司，給𪜶問有關律法的問題。

¹² 若有人用衫仔裾包奉獻歸聖的肉，然後衫仔裾去磕著餅、湯、酒、油，抑是其他食物，彼個食物豈會當算做聖？』」 祭司應講：「𣍐。」

¹³ 哈該閣講：「若有人摸著屍體煞無清氣，伊摸著的食物豈會算做無清氣？」 祭司應講：「會，彼個食物算做無清氣。」

¹⁴ 然後哈該講：「上主講：『此個子民，此個國佇我目睭前就是按呢；𪜶的手所做逐項工作，所獻逐項祭物嘛攏無清氣。』」

上主應允賜福

¹⁵ 「今恁著用心檢討，佇上主的殿重建以前，

¹⁶ 恁按怎啲過日？有人去五穀堆，想講會得著二十斗小麥，只有得著十斗；去酒池，想講會得著五十桶酒，只有得著二十桶。

¹⁷ 上主講：『我用火燒風、病害、冰雹給恁處罰，恁猶無悔改。

¹⁸ 對今仔日，九月二四，就是下上主聖殿的地基的日起，恁著用心檢討，著省察。

¹⁹ 倉庫裡猶有種籽無？雖然葡萄樹、無花果樹、石榴樹、橄欖樹攏猶未結果子，毋拘對今仔日起我欲賜福互恁。』」

上主對所羅巴伯的應允

²⁰ 像彼日，就是九月二四，上主第二遍對哈該講：

²¹ 「你去給猶大省長所羅巴伯講：『我啲欲互天及地搖泏，

²² 推翻列國的勢力，閣終止𪜶的權力，捙倒戰車及駛車的，互馬死兵亡，軍中兄弟互相殘殺。』

²³ 上主 — 萬軍的統帥講：『撒拉鐵的子，我的僕人所羅巴伯，我上主講：佇彼日，我欲用你做我的手指印，因為我有揀選你！』上主 — 萬軍的統帥按呢宣布。」