Chim-giân 9 - 現代台語譯本漢字版

智慧及愚戇

¹ 智慧有起厝， 𫞼七支石柱；

² 有刣牲生，調和酒， 閣辦桌。

³ 伊差女婢出去， 佇城內上高的所在宣布：

⁴ 「戇直的人攏斡來遮。」 智慧給無知的人講：

⁵ 「恁來，來食我的餅， 飲我調和的酒。

⁶ 恁放拺無知就得著性命， 嘛著行光明的路。」

⁷ 糾正愛藐視人的，本身會受凌辱； 譴責歹人，家己取見笑。

⁸ 毋通譴責愛藐視人的，因為伊會怨恨你； 譴責有智慧的人，伊會疼你。

⁹ 教導有智慧的人，伊會愈有智慧； 教示義人，伊會加添學問。

¹⁰ 敬畏上主是智慧的根本； 識彼位至聖的上帝就是聰明。

¹¹ 因為靠我，你的日子會增加， 你的年歲嘛會加添。

¹² 你若有智慧，智慧會互你有利益； 你若愛給人藐視，受損的是你家己。

¹³ 戇的查某人講話大細聲； 伊戇直，毋識半項。

¹⁴ 伊坐佇家己的門口， 坐佇城內上高的所在，

¹⁵ 叫過路的人， 叫趕緊啲經過的人，講：

¹⁶ 「戇直的人攏斡來遮。」 伊給無知的人講：

¹⁷ 「偷舀的水較甜； 偷食的餅較有滋味。」

¹⁸ 毋拘愚戇的人毋知佇伊遐有陰魂； 伊的人客佇陰府上深的所在。