Chim-giân 8 - 現代台語譯本漢字版

稱讚智慧

¹ 著聽，智慧啲叫， 聰明啲出聲。

² 智慧佇路邊高的所在， 徛佇十字路口。

³ 智慧佇城門口， 佇人啲出入的所在大聲喝：

⁴ 「眾人啊，我叫恁； 世間人啊，我對恁講。

⁵ 戇直的人啊，著學習精明； 愚戇的人啊，著追求聰明。

⁶ 著聽，我欲講極好的事， 欲論正直的代誌。

⁷ 我的嘴講真實； 我的嘴唇厭惡邪惡。

⁸ 我所講的話攏公正， 無彎曲，無歪曲。

⁹ 明理的人攏會了解； 有智識的人攏看做正確。

¹⁰ 接受我的管教比得著銀較好； 得著智識比得著純金較好。

¹¹ 因為智慧比紅寶石較好； 人所意愛的攏𣍐當及伊比。

¹² 「我是智慧，互人精明， 互人有智識𠢕計劃。

¹³ 敬畏上主就著厭惡邪惡； 驕傲、自大、邪惡的行為， 以及歪曲是非攏是我所厭惡。

¹⁴ 我有策略及真的智識； 我聰明，有能力。

¹⁵ 君王靠我來統治； 統治者通過我定公平的法律。

¹⁶ 王親貴族、世上的審判官， 攏靠我來掌權。

¹⁷ 疼我的，我嘛疼伊； 懇切尋我的，會尋著。

¹⁸ 好額及尊貴是我所賜； 久長的富裕及繁榮嘛是我所賜。

¹⁹ 我互人的果子比金，比純金較好； 我互人的收成比純的銀較好。

²⁰ 我行公義的路， 行公平的道路，

²¹ 互疼我的人得著財富， 互𪜶的財寶滿滿。

²² 「佇創造的起頭，上主先造我； 自古以來，我是伊頭一個創造的。

²³ 佇上起頭，佇創造世界以前， 對極古早，伊造我。

²⁴ 我出世的時猶未有深淵， 嘛猶未有海洋。

²⁵ 我出母胎的時，大山猶未受造， 小山嘛猶未形成。

²⁶ 彼時大地及田野猶未創造， 連地上頭一把土粉嘛猶未有。

²⁷ 伊安置穹蒼， 佇海面畫地平線， 彼時我已經佇遐。

²⁸ 伊佇空中布置雲彩， 互深淵的水泉淐出來，

²⁹ 給海定界限，互海水𣍐𨃟過界， 給大地下地基， 彼時我已經佇遐。

³⁰ 彼時，我佇伊身邊做師傅頭， 逐日互伊歡喜。 我不時佇伊面前歡喜快樂，

³¹ 意愛伊互人徛起的世界， 歡喜伊創造的世間人。

³² 「今，我的子兒，著聽趁我； 遵行我道路的人真有福氣！

³³ 著聽教示來得著智慧， 毋通拒絕。

³⁴ 聽趁我的人真有福氣！ 𪜶逐日佇我的門口啲等， 佇我的門邊啲聽候。

³⁵ 尋著我的人就是尋著性命； 伊會對上主得著恩惠。

³⁶ 尋無著我的人會滅亡； 怨恨我的人家己尋死。」