Chim-giân 7 - 現代台語譯本漢字版

¹ 我的子啊，著遵守我的話， 心內囥我的命令。

² 遵守我的命令就會得著性命； 遵守我的教示，親像啲保護目睭仁。

³ 著縛佇你的指頭仔， 刻佇你的心內。

⁴ 著對智慧講「你是我的姊妹」； 著叫聰明做你的親人。

⁵ 伊會保護你閃避淫婦， 閃避講思奶話的妓女。

禁戒淫亂

⁶ 我徛佇阮兜的窗仔邊， 對窗仔看出去；

⁷ 我佇戇直的少年人中間， 看著一個𣍐曉想的少年家。

⁸ 伊經過街路，來到淫婦𪜶厝的巷仔口， 閃入去淫婦𪜶兜的路。

⁹ 黃昏，日落， 烏暗罩倚；

¹⁰ 彼時有一個查某人， 穿插親像妓女，心懷企圖出來接伊。

¹¹ 此個查某人講話大細聲，無教養， 厝住𣍐牢。

¹² 有時佇街路，有時佇市場口； 有時佇遮聽候，有時佇遐當等。

¹³ 伊給彼個少年家擒牢牢，給伊唚， 毋驚見笑對伊講：

¹⁴ 「我今仔日有獻平安祭， 厝內有謝願的肉，

¹⁵ 所以我出來尋你， 尋真久才尋著。

¹⁶ 我已經用埃及彩色的床巾， 舒佇我的眠床；

¹⁷ 閣用沒藥、沉香、肉桂， 灑佇我的眠床。

¹⁸ 來，咱來通宵享受情愛到滿足， 來享受情愛的快樂。

¹⁹ 因為我的丈夫無佇厝裡， 出外去真遠的所在。

²⁰ 伊帶歸袋的錢， 到月圓才會倒來。」

²¹ 淫婦用真多花言巧語給伊引誘， 用思奶的嘴催迫伊做夥入去。

²² 伊隨時隨伊入去， 親像牛互人牽去刣， 親像鹿仔跋落陷阱，

²³ 到箭射入伊的肝； 伊親像鳥仔闖入羅網猶毋知死活。

²⁴ 我的子兒啊，著聽趁我， 留心聽我所講的話。

²⁵ 你的心毋通互伊迷去， 毋通戇戇仔隨伊去。

²⁶ 因為伊互真多人受傷倒落去； 真多人互伊害死。

²⁷ 伊的厝是陰府的入口， 直接迵到死亡。