Chim-giân 6 - 現代台語譯本漢字版

繼續勸戒

¹ 我的子啊，你若為著厝邊做擔保， 替外人保證，

² 你就互家己講的話罩著， 互家己答應的話纏著。

³ 我的子啊，既然你落佇厝邊的手頭， 著按呢做來救家己： 著緊去，謙卑懇求你的厝邊。

⁴ 目睭毋通睏去， 目睭皮毋通瞌去。

⁵ 著救家己，親像鹿脫離拍獵的人的手； 親像鳥脫離掠鳥的人的手。

⁶ 貧憚人啊，去看蚼蟻， 看伊的所做通得著智慧。

⁷ 伊無領袖， 無頭目，無官長，

⁸ 毋拘會曉佇熱天準備食物， 佇收成的時積聚米糧。

⁹ 貧憚人啊，你欲睏偌久， 什麼時才睏會醒？

¹⁰ 閣睏一久仔，閣眠一時仔， 閣撐一下仔；

¹¹ 散赤就親像賊來； 欠缺親像強盜到。

¹² 流氓匪類逐所在製造是非， 四界講話欺騙人；

¹³ 𪜶使目尾示意，用腳暗示， 用指頭仔指點；

¹⁴ 𪜶心思歪斜，計謀歹代； 四界使弄，惹起紛爭。

¹⁵ 所以災禍忽然臨到； 伊會隨時失敗滅亡，𣍐赴給救。

¹⁶ 有六項是上主所怨恨， 連伊的心所厭惡的有七項：

¹⁷ 就是驕傲的目睭， 講白賊的舌， 刣無辜的人的手，

¹⁸ 計謀歹代的心， 奔走歹路的腳，

¹⁹ 講白賊作偽證， 佇兄弟中使弄人冤家。

警戒淫亂

²⁰ 我的子啊，著遵守老父的命令， 毋通棄拺老母的教示；

²¹ 著不時記佇你的心， 掛佇你的頷頸。

²² 你行路的時，伊會引導你； 你睏的時，伊會看顧你； 你睏醒，伊會及你談論。

²³ 因為命令是燈，教示是光； 管教的責備會導你行活命的路，

²⁴ 會保護你無親近歹查某， 無聽妓女思奶的話。

²⁵ 你的心毋通互伊的媠迷去， 毋通因為伊使目尾受引誘。

²⁶ 尋妓女會互人散甲賰一塊餅； 及別人的某姦淫會喪失寶貴的性命。

²⁷ 人抱火佇胸前， 衫豈𣍐𤏸起來？

²⁸ 人踏啲𤏸的火炭， 腳豈𣍐燒著？

²⁹ 及厝邊的某做夥睏嘛會按呢； 及伊發生關係一定會受刑罰。

³⁰ 賊因為枵偷提物止飢， 人𣍐給伊看輕；

³¹ 毋拘互人掠著，著賠七倍， 家內所有的攏著提出來賠。

³² 及別人的某通姦的人真無智識； 做此款代誌會害著家己的性命。

³³ 伊會受著傷害及凌辱； 伊的見笑洗𣍐清。

³⁴ 丈夫因為怨妒起大受氣； 報仇的時一定𣍐留情。

³⁵ 用錢贖罪，伊毋揲； 禮物送較多，伊嘛毋放你煞。